Legionerlarimizdan daraklar: “Spartak” O'runovni qanchaga sotmoqchi?

Oston O'runovning bahosi - 3 mln. evro. Rossiya matbuotida yozilishicha, "Spartak" ayni payt "Ufa"da ijara muddatini o'tayotgan hamyurtimiz Oston O'runov transferini sotishga tayyor. Moskva klubi milliy jamoamiz yarim himoyachisi uchun 3 mln. evro olmoqchi. "Ufa" esa bunga javoban futbolchi uchun 1 mln. evro bermoqchi ekanligini ma'lum qildi. Eslatma, "Spartak" O'runovni 2020 yilning avgustida "Ufa"dan aynan 1 mln. evroga sotib olgan, keyinchalik uni ijara kelishuvi asosida ortga qaytargan edi. O'z o'rnida aytish kerak, "Ufa" RPL 28-turida TsSKA mehmoni bo'lib, ortga 1 ochko bilan qaytdi - 1:1. Oston esa o'yinning 74-daqiqasida zaxiradan maydonga tushib, yakunda sariq kartochka oldi.

Nihoyat, debyut. Jasur Yaxshiboev Polsha chempionati 28-turida nihoyat, "Legiya" safida debyut qildi. U "Visla"ga qarshi kechgan va 0:0 hisobida yakunlangan bahsning 79-daqiqasida portugaliyalik Rafael o'rniga maydonga tushdi. Eslatma, Varshava klubi avvalgi turda o'z tarixida 15-marta mamlakat chempioni bo'lgandi. "Legiya" ChL-2021|2022ni birinchi saralash raundidan boshlashini ma'lumot sifatida keltirish o'rinli.

Atigi 18 daqiqa. Belarus Oliy ligasi 7-turidan o'rin olgan BATE - "Smorgon" o'yinida mezbonlar 1:0 hisobida ustun kelishdi. Borisov jamoasida chakki o'ynamayotgan hamyurtimiz Shahboz Umarov bu o'yin yakunlanishiga atigi 18 daqiqa qolganida maydonga tushdi. "Shaxtyor" hujumchisi Shahzod Ubaydullaev esa jamoasining "Sputnik"ga qarshi o'yini (2:1)da maydonga tushgani yo'q.

Sergeev gol urdi, ammo... "Aktobe" klubi Qozog'iston Premer-ligasi  8-turida "Taraz" mehmoni bo'lib, ortga 1:3 hisobidagi mag'lubiyat bilan qaytdi. Jamoa safidagi Igor Sergeev o'yinga 52-daqiqada qo'shilib, o'z hisobiga navbatdagi golni yozib qo'ydi. Biroq Igor o'zini ko'rsatgan 76-daqiqaga qadar "Aktobe" 3ta gol qo'yib yuborishga ulgurgandi... Aktyubinskliklar ke-yingi turda ham mag'lubiyatga uchrashdi - o'z maydonlarida "Astana"ga 0:2 hisobida. Igor bunisida to'liq 90 daqiqa to'p surdi.

Shomurodov yana gol urdi, ammo... Italiya "A" seriya 34-turi doirasidagi "Latsio" - "Jenoa" o'yini 4:3 hisobida yakuniga etdi. Genuyaliklar hujumchisi Eldor Shomurodov Rimda bo'lib o'tgan uchrashuvda to'liq vaqt to'p surib, 81-daqiqada chempionat hisobidan 5-golini nishonladi. Biroq "Jenoa" mag'lubiyatdan qochib qutulolmadi, baribir.