"Tottenxem" murabbiyligiga yana bir nomzod e'lon qilindi

Londonning "Tottenxem" klubi 58 yoshli portugaliyalik murabbiy Joze Mourinoning iste'fosidan keyin yangi bosh murabbiy izlashni davom ettirmoqda. Jurnalist Fabritsio Romano tvitterida yozishicha, "Tottenxem" rahbarlari "Ayaks" jamoasining amaldagi ustozi Erik ten Xey bilan yuzma-yuz uchrashishni rejalashtirgan.

Qayd etilishicha, 51 yoshli murabbiyning o'zi Angliyada ishlashga qarshi emas, ammo hozircha hech narsa hal qilinmagan. Oldinroq Britaniyaning "The Telegraph" nashri Xeyni "Tottenxem" bosh murabbiyi lavozimiga asosiy da'vogar deb atagandi. Nomzodlar orasida Ralf Rangnik, Nagelsmann, Angliya bosh murabbiyi Garet Sautgeyt va Belgiya terma jamoasi etakchisi Roberto Martines bor edi.

Eslatib o'tamiz, Mourino ketganidan so'ng, klubning sobiq futbolchisi Rayan Meyson "Tottenxem" bosh murabbiyi vazifasini bajaruvchiga aylangandi.