Baqoev: "Bugungi natijani jangovar durang desak mubolag'a bo'lmaydi"

Jizzaxning «So'g'diyona» jamoasi O'zbekiston kubogi guruh bosqichi ikkinchi turida Toshkentda «Bunyodkor» mehmoni bo'ldi (1:1).
Ushbu uchrashuvdan so'ng jamoa bosh murabbiyi Ulug'bek Baqoev fikrlarini bildirib o'tdi.

"Birinchi bo'limda biroz zerikarli o'yin bo'ldi. Raqib bizning xududimizda ko'proq to'pni nazorat qilishga harakat qildi. Tezkor gol urib olganimiz hisobiga tanaffusga yaxshi kayfiyatda yo'l oldik. Ikkinchi bo'limni uchta o'zgarish bilan boshladik.

Bundan ko'zlangan maqsad barcha futbolchilarga imkoniyat berishdir. Bugungi natijani jangovar durang desak mubolag'a bo'lmaydi.  «Bunyodkor»ga keyingi uchrashuvlarda omad tilayman. Xuddi shu omad bizga ham kerak", - deydi Baqoev.