Sardor Rahmonov: «Al-Hilol»da jahon darajasidagi nomlar bo'lsa, AGMKda kuchli va ahil jamoa shakllanganini isbotladik»

AGMK himoyachisi Sardor Rahmonov "Al-Hilol" bilan kechgan uchrashuvdan keyingi fikrlarini bildirib o'tdi.

"O'yin murakkab o'tishini bilardik va shunga yarasha bahsga taraddud ko'rgandik. Murabbiylarimiz raqibning kuchli va kuchsiz taraflarini o'rganib chiqib, bizga tegishli ko'rsatmalarni berishdi. Ko'rsatmalar asosida harakat qildik va o'ylashimcha, kuchli raqibga nisbatan munosib qarshilik ko'rsatdik. Hech bir jihatdan ulardan qolishganimiz yo'q. Vaziyatlar yaratishda ham nisbatan golli imkoniyatlar bizda ko'proq vujudga keldi. G'alabaga ham yaqin kelgandik. Lekin murosasiz o'tgan bahs jangovor durang bilan tugadi.

Raqib safida jahon darajasidagi legionerlar harakat qildi. Ularda kuchli nomlar bor va "Al-Hilol"ning o'yinini aynan legionerlar belgilab beradi. Bizda esa ahil jamoa shakllangan va birlashib har qanday jamoaga qarshi o'ynash mumkinligini isbotladik. Adashmasam, Ar-Riyodda "Al-Hilol"dan ochko olgan ilk o'zbek jamoasiga aylandik. "Al-Hilol" bilan Saudiya Arabistonida durang o'ynash yomon natija emas. Lekin biz har bir uchrashuvga g'alaba ilinjida maydonga tushamiz. Katta musobaqadagi ilk o'yin o'tdi. Hali hammasi oldinda va bizni muhim bahslar kutmoqda. Maqsadimiz guruh bosqichidan muvaffaqiyatli o'tish va bu yo'lda bor imkoniyatlarimizni ishga solamiz. Shu o'rinda bizni qo'llab-quvvatlab turgan barcha o'zbekistonlik futbol ishqibozlariga minnatdorchilik bildiraman va kelgusi o'yinlarda ularni yanada xursand etishga urinamiz", — dedi Sardor Rahmonov.

Manba: https://t.me/pfcagmk