Mirjalol Qosimov: "Al Hilol" nomdor jamoa, raqibni hurmat qilamiz, ammo ulardan qo'rqmaymiz"

OChL "A" guruhi 1-tur doirasidagi "Al-Hilol" — AGMK uchrashuvidan oldin tashkillashtirilgan matbuot anjumanida jamoamiz bosh murabbiyi Mirjalol Qosimov bilan birgalikda futbolchi Yovan Jokich qatnashdi.

Mirjalol Qosimov: "Avvalambor Assalomu alaykum! Barcha musulmon ahli va yurtdoshlarimizni kirib kelgan muborak Ramazon oyi bilan qutlayman. Hammaga sihat-salomatlik va omad tilayman. Ertaga AGMK jamoasi uchun yangi sahifa ochilmoqda. Jamoamiz ilk bor OChL guruh bosqichida ishtirok etadi. Maqsad guruhdan chiqish. Guruh bosqichi yakunida to'plangan ochkolarga qarab kim qaysi o'rinni olishini bilib olamiz".

— AGMK Saudiyaga kelishidan avval OChL pley-off doirasida o'ynadi. Bu holat jamoaning tiklanish jarayoniga qay darajada ta'sir qiladi?
— Jamoamiz bu erga kelishdan avval muhim va murakkab kechgan o'yinda qatnashdi hamda bu oralig'da yo'l, parvozlar. Qatarga bordik va u erdan Toshkentga qaytib, so'ngra Saudiya Arabistoniga keldik. Lekin bu biz uchun bahona bo'lib qolishi kerak emas. Bu erga yaxshi niyatlar bilan keldik. O'ylaymanki, bu jihat u qadar katta ta'sir o'tkazmaydi.

— Ramazon oyi futbolchilarga qanchalik ta'sir ko'rsatadi, deb o'ylaysiz?
— Bu ta'sir qilmaydi. Orada vaqt bor. O'yinlar iftorlikdan keyin mahalliy vaqt bilan kechki 22:00ga belgilangan. Bu vaqt ichida futbolchilar tiklanib olishadi.

— "Al Hilol" bilan o'yinda jamoangizdan nimani kutyapsiz?
— Har bir murabbiy jamoasidan yaxshi natija kutadi. Bu oson bo'lmasligini bilib turibmiz. "Al Hilol" nomdor jamoa. Raqibni hurmat qilamiz, ammo qo'rqmaymiz. AGMK ushbu musobaqaga yaxshi niyatlar bilan etib keldi. O'ylaymanki, jamoamiz chiroyli o'ynab, g'alabaga intiladi.

Yovan Jokich: "Ertaga juda ham qiyin o'yin bo'ladi. Biz muhim uchrashuvga astoydil tayyorgarlik ko'ramiz. Umid qilamanki, ertangi bahs biz uchun omadli bo'ladi".