“Sho'rtan”ning muvafaqqiyatsizliklariga kim sababchi?

Bir vaqtlar milliy chempionatimiz yuqori divizionida ham o'ziga yarasha nomga ega bo'lgan G'uzorning “Sho'rtan” klubida hozir vaziyat juda achinarli. Klub moliyaviy inqiroz va shuning oqibatida kelib chiqqan cheklovlar tufayli Pro ligada ham munosib ishtirok etishga qiynalmoqda. Ammo, O'zPFL rahbarlari klub taqdiriga befarq emas va tashkilot direktori vazifasini bajaruvchi Diyor Imomxo'jaev o'zining telegram kanalida “Sho'rtan” haqida quyidagicha post joyladi.

“Sho'rtan" futbol klubi ortda qolgan to'rt turning 2 tasida yirik mag'lubiyatlar qabul qilib oldi.

Boisi, FIFA taqiqi sabab Sho'rtan yil avvalida yangi futbolchilar bilan shartnoma imzolay olmadi. Shuningdek, borlarini saqlab qolishning ham imkoni bo'lmadi. O'z-o'zidan "Sho'rtan" deyarli malakaga ega bo'lmagan futbolchilar bilan o'ynashga majbur.

Hammasiga sabab o'sha Vitaliy Varivonchik va Igor Kriushenko bilan ishlangan yillar. Klubning bugungi rahbariyati mana shu ishga chek qo'yishiga oz qoldi. Bu borada biz "Sho'rtan"ga qo'limizdan kelganicha yordam beramiz.

Oldinda ko'plab qarzdor klublarimizni shu taqdir kutadi va biz bu ishni FIFA yordamisiz amalga oshiramiz. Klublar yangi futbolchilarga millionlar taklif qilishdan avval o'z akademiyalarini shakllantirishni o'ylashlari shart bo'ladi. Yoki bo'lmasa o'zaro oldi-berdilar vaqtida bajarilishi lozim. Hozir klublarimizning deyarli yarmi bir-biriga qarzdor. O'sha kungi postda aytganimizdek, aka-ukalar tayyor pulni otalaridan olib ham yana bir-birlariga qarz bo'lib qolishgan” – dedi Imomxo'jaev.