Piter Xyuistra: «Navbahor» ikkinchi bo'limda muxlislar madadi bilan o'yinni kuchaytirdi»

"Navbahor" - "Paxtakor" uchrashuvidan keyingi matbuot anjumanining dastlabki qismida mehmonlar ustozi Piter Xyuistra jurnalistlar savollariga javob qaytardi.

- "Navbahor" bilan safardagi o'yinlarimiz doimo og'ir o'tadi. Namangandagi uchrashuvlar hissiyotlarga boy tarzda kechadi. Maydon holati biroz yomon bo'lgani uchun o'z o'yinimizni ko'rsata olmadik. Birinchi bo'limni yaxshi o'tkazdik. Lekin ikkinchi bo'limda muxlislar madadi bilan mezbonlar o'yinni kuchaytirib, hisobni tenglashtirishdi. Hakamning yaqqol penaltini bermagani hayron bo'lgandim, baribir, VAR yordamida penalti belgiladi. O'zbekistondagi faoliyatim davomida ikkinchi marta Namanganda g'alaba qozondik.

Eren Derdiyok kichik jarohati sabab, qolaversa, Chempionlar Ligasi o'yiniga tayyorgarlik ko'rishi sababli bugun maydonga tushmadi.

Chindan ham ko'plab xatolarga yo'l qo'ydik. Umuman olganda esa, shogirdlarim bugun yomon to'p surishmadi. Xatolarni esa maydon sifatining yaxshi emasligi bilan izohlayman.

Hojimat Erkinov allaqachon bu mavsumda zaxiradan o'yinga tushib ham ko'p foyda keltirdi. Bu mavsum ko'plab yoshlarimiz bizga naf keltirishlariga ishonaman. Nafaqat ichki chempionat, balki Chempionlar Ligasida ham ularning yordamiga tayanamiz.

Futbolchilarning vaqt cho'zishga intilishlarini o'zim ham yoqtirmayman. Bunday narsalarga qarshiman", — dedi Piter Xyuistra.