Sanjar Tursunov: «AGMK «Al-G'arafa»dan qo'rqmaydi, lekin raqibni hurmat qiladi»

Osiyo chempionlar ligasi pley-off bosqichi doirasidagi "Al-G'arafa" - AGMK uchrashuvi oldidan tashkil etilgan matbuot anjumanida olmaliqliklar sardori Sanjar Tursunov ham ishtirok etib, o'z fikrlari bilan o'rtoqlashdi.

Sanjar Tursunovga qatarlik jurnalist tomonidan berilgan "Nima deb o'ylaysiz, ertangi o'yin yakunlangani haqidagi hakam xushtagidan so'ng AGMK jamoasining orzulari to'xtaydimi yoki davom etadimi?", degan savolga jamoamiz sardori shunday javob qaytardi:

"Ertaga bizni qiyin o'yin kutib turganini bilaman. "Al-G'arafa" chempionatda qoniqarli o'ynay olmayotgan bo'lsada, OChL butkul boshqa musobaqa va bunga chalg'imaslik lozim.

Hammasi bitta o'yinga bog'liq. Har qanday jamoa bir o'yinga boshqacha kayfiyatdagi munosabat bilan tushishi mumkin. Shuni aytishim mumkinki, AGMK "Al-G'arafa"dan qo'rqmaydi, lekin raqibni hurmat qiladi.

Ertaga g'alaba qozonib, Olmaliqqa bayram taqdim etish va O'zbekiston klublarining xalqaro maydondagi mavqeini ko'tarish uchun borimizni berib harakat qilamiz", — dedi Tursunov.