Gulnoza Matniyazova ketma-ket ikkinchi bor «katta dubulg'a» sovrindoriga aylandi

Gruziya poytaxtida o'tkazilayotgan dzyudo bo'yicha “Katta dubulg'a” turnirida ikkinchi kun bellashuvlari o'z yakuniga etib bormoqda. Biroz avval hamyurtimiz Gulnoza Matniyazova -70 kg vazn toifasida bronza medali uchun kurashda ishtirok etdi.

Ma'lum qilganimizdek, yurtdoshimiz ushbu bosqichga sloveniyalik Anka Pogachnikka qarshi tatamiga chiqdi. Matniyazovaning ustunligida kechgan bahs yakunda uning foydasiga hal bo'ldi va dzyudochimiz bronza medali bilan taqdirlandi. Shu bilan ushbu dzyudochilar o'rtasidagi o'zaro qarama-qarshilik 5:1 ko'rinishiga keldi.

Shu tariqa, Gulnoza Matniyazova faoliyatida ketma-ket ikkinchi bor “Katta dubulg'a” turnirida shohsupaga ko'tarilmoqda. Sportchimiz bundan avval Toshkentda o'tgan xuddi tasnifdagi musobaqada ham bronza medaliga sazovor bo'lgan edi. Bu bilan dzyudochimiz o'z hisobiga Tokio Olimpiadasi va jahon reytingi uchun 500 ochkoni qo'shib qo'ymoqda.

Manba: olympic.uz