«Vulvz» darvozaboniga 15 daqiqa davomida maydonda tibbiy yordam ko'rsatildi

Angliya chempionatining 29-turidan o'rin olgan «Vulverxempton» va «Liverpul» jamoalari o'rtasidagi o'yinda (0:1) mezbonlar posboni Rui Patrisiu jarohat olgani tufayli bahs cho'zilib ketdi.

Uchrashuvning 86-daqiqasida portugaliyalik posbon o'z jamoasi himoyachisi Konor Kaudi bilan to'qnash ketdi (himoyachining tizzasi Patrisiuning boshiga tegdi). Unga tibbiy yordam ko'rsatish jarayoni 15 daqiqa davom etdi. 101-daqiqada uni zambilda maydondan olib chiqib ketishdi.

Mezbonlar bosh murabbiyi Nunu Eshpiritu Santu barcha 3 almashtirishni amalga oshirib bo'lganiga qaramay, «Vulvz» zaxira posbonini maydonga tushira oldi. Chunki, yangi qoidaga ko'ra, futbolchi miya chayqalish jarohatini olganida, qo'shimcha o'zgarish qilishga ruxsat berilgan.

O'yindan keyin "Vulverxempton" bosh murabbiyi darvozabonning ahvoli haqida ma'lumot berib o'tdi.

«Hozirgina uning ahvoli haqida ma'lumot oldik: uning holati yaxshi. U hushida va barchasini eslamoqda. U tezda tiklanadi», – dedi Nunu.

Patrisiu APLning joriy mavsumida 29ta o'yinda maydonga tushib, 9ta bahsda darvoza daxlsizligini saqlab qoldi.