Pro-liga. «Neftchi» - «Olimpik» o'yiniga muxlislar kiritiladimi?

Pro liga ilk turida «Neftchi» o'z maydonida «Olimpik»ni qabul qilishi aniq bo'ldi. Kechadan buyon yuzlab farg'onaliklar uchrashuvga muxlislar kiritilishiga ruxsat berishimizni so'rashyapti.

O'tgan yilning 7 dekabr kuni O'FA Tartib-intizom qo'mitasi «Neftchi» — Turon uchrashuvi bo'yicha yig'ilgan hamda o'z qarorini chiqargan. Unga ko'ra, «Neftchi» klubi ketma-ket uch uy uchrashuvini muxlislarsiz o'tkazishi belgilab qo'yilgan.

O'sha yig'ilishda O'zPFL vakillari ham ishtirok etgan bo'lib, biz qo'mitadan «Neftchi» futbol klubining uy uchrashuvlarini o'tkazish bo'yicha taqiq qo'ymaslikni, klub Andijonga qarshi pley-off o'yinini Istiqlol stadionida o'tkazishi bo'yicha iltimosnoma kiritganmiz. Qo'mita buni qanoatlantirgan, shundan kelib chiqib Andijonga qarshi bellashuv Istiqlolda o'tgan.

Biroq qo'mita qaroridan kelib chiqib, «Neftchi» — Olimpik va «Neftchi» — Istiqlol o'yinlari tomoshabinlarsiz o'tishi kerak. Ushbu qaror O'zPFL yoki O'FA tomonidan bekor qilinmaydi. Qo'mita qarori har ikki tashkilot tomonidan bajarilishi shart. Shundan kelib chiqib, mavzu yuzasidan bizga chiqilishi to'g'ri bo'lmaydi.

Biz «Neftchi» futbol klubiga yangi mavsumda omad tilaymiz. Futbol muxlislaridan esa uchrashuvlarda o'zlarini to'g'ri tuta bilishlarini so'raymiz.

Diyor Imomxo'jaev.