Voleybol: Turkiya Birinchi ligasida porlayotgan o'zbek o'g'loni (video)

So'nggi yillarda sportning o'yin turlari bo'yicha mamlakatimizning etakchi vakillari o'z mahoratlarini xorijda ham namoyish etgan holda avvalo Vatanimiz sha'nini ulug'lashmoqda. Qolaversa, o'z tajribalarini boyitish orqali milliy terma jamoalarimiz yutuqlariga ham munosib ulush qo'shishyapti.

Ana shunday sportchilarimizdan biri voleybolchi Islomjon Sobirovdir. Bu yosh, iste'dodli sportchimiz hozirda Turkiya Birinchi ligasi vakili “Alanya Belediespor” klubi sharafini himoya qilib kelmoqda.

Voleybol Turkiyada ancha ommalashgan sport turlaridan biri. Hattoki mamlakat Birinchi liga musobaqalarida ham 24(!)ta jamoa ikki guruhga bo'lingan holda bahs olib borishayotgani Turkiyada voleybolga qiziqish yuqori ekanligini anglatadi.

Ayni paytda “Alanya Belediespor” klubi “A” guruhida 16 o'yindan so'ng 37 ochko jamg'argan holda 2-o'rinni egallab turibdi. Islomjon Sobirov esa barcha o'yinlarda jamoasi asosiy tarkibida maydonga tushib, “Alanya Belediesport” muvaffaqiyatlariga munosib hissasini qo'shmoqda.

Quyida Islomjon Sobirovning Turkiya Birinchi ligasidagi samarali harakatlari aks etgan lavhalar bilan tanishing.

Manba: minsport.uz