BAA Pro-Ligasi. Hamdamov qizil kartochka olgan bahsda «Hatta» g'alaba qozondi, «Shabob al-Ahli» Hamrobekovning debyut o'yinida peshqadamdan ochko tortib oldi

Birlashgan Arab Amirliklari Pro-Ligasining 19-turidan o'rin olgan ikkita o'yin 6 mart, shanba kuni bo'lib o'tdi.

«Shabob al-Ahli» jamoasi musobaqa peshqadami «Al-Jazira» maydonida mehmon bo'ldi. Uchrashuvning 60-daqiqasida Karlos Eduardo dubayliklarni oldinga olib chiqdi. O'yin asosiy vaqtining so'nggi daqiqasida mezbonlar jarima zarbasi ishlab oldi va uni Milosh Kosanovich aniq ijro etib, muvozanatni tikladi.

Uchrashuvni asosiy tarkibda boshlagan Jaloliddin Masharipov to'liq harakat qilgan bo'lsa, Odiljon Hamrobekov 79-daqiqada zaxiradan maydonga tushib, debyutini nishonladi.

«Shabob» 33 ochko bilan 4-o'rinda bormoqda, «Al-Jazira» (41) esa musobaqa jadvalida peshqadamlik qilmoqda.

«Hatta» jamoasi o'z uyida «Al-Fujayra»ni qabul qildi. Uchrashuvning 73-daqiqada Doston Hamdamov maydon markazidagi to'qnashuvdan keyin ikkinchi sariq kartochkasini olib, maydondan chetlatildi. O'yin yakunlanishi arafasida maydon egalari penalti ishlab oldi, uni Jonatas muvaffaqiyatli bajardi. Ushbu gol amalda o'yin taqdirini hal qildi.

«Hatta» mavsumdagi ikkinchi g'alabasini qo'lga kiritgan holda ochkolarini 8 taga etkazib oldi va so'nggi o'rinda bormoqda. «Al-Fujayra» (10) 12-pog'onadan joy olgan.

Uchrashuvlarda kiritilgan gollarni bu erda ko'rish mumkin — havola.

BAA Pro-Ligasi, 19-tur
6 mart, shanba
«Al-Jazira» — «Shabob al-Ahli» 1:1
Gollar: 0:1 – 60 Karlos Eduardo, 1:1 – 90+2 Kosanovich.
Chetlatish: Hassan Majid – 90 («Shabob al-Ahli»).

«Hatta» — «Al-Fujayra» 1:0
Gol: 1:0 – 85, penalti Jonatas.
Chetlatish: Doston Hamdamov – 73 («Hatta»).

Manba: daryo.uz