“Navbahor” PFK prezidenti yoshlar (U-18) jamoasi bilan uchrashdi

Xabaringiz bor, “Navbahor” jamoasi 2021 yilgi mavsumdan iqtidorli yoshlarni tarbiyalab, ularning katta futbolda o'z o'rinlarini topishlarida ko'maklashish va albatta, ularning vaqti kelib, “Navbahor”ning asosiy tarkibida to'p surishlarini ta'minlash maqsadida yangi strategiya asosida ish yuritadigan bo'ldi. Jamoa rahbariyati asosiy tarkibdan tashqari, yoshlar jamoalarining ham chempionatda munosib ishtirok etishlari uchun zarur shart-sharoitlarni yaratib berishmoqda, ular bilan turli uchrashuvlar o'tkazib, yangi maqsadlar sari ruhlantirishmoqda.

Jumladan, bugun Namangandagi “Markaziy” stadionida “Navbahor” PFK prezidenti Otabek Samatov “Navbahor-U-18” jamoasi futbolchilari bilan uchrashib, ularga yangi mavsumda omad yor bo'lishini tiladi.

- Avvalambor, “Navbahor” bilan shartnoma imzolab, jamoaning to'laqonli a'zosiga aylanganingiz bilan barchangizni tabriklayman, - dedi Otabek Arifovich. - Bilasiz, “Navbahor” mamlakatimizning eng nomdor jamoalaridan biri hisoblanadi, demakki, sizlar ham shuni dildan his qilgan holda, maydonda bor iqtidoringizni namoyon etishingiz, “Navbahor” libosida to'p surishga munosib ekanligingizni isbotlashingiz kerak. Xabaringiz bor, jamoaga tajribali Viktor Romanovich Jalilovni taklif qilganmiz, namanganlik ko'plab iqtidorli yoshlarni saralab, ularning katta futbolda o'z o'rnini topishiga hissa qo'shgan ushbu mutaxassis sizlarning ham maydondagi harakatlaringizni shaxsan kuzatib, o'yiningizni baholab borishini inobatga olinglar. Unutmang, bu daraja jihatidan o'sishingiz uchun katta imkoniyatdir. Kim o'zidan yorqin taassurot qoldirsa, albatta, bosqichma‑bosqich rivojlanib, nasib qilsa, “Navbahor”ning asosiy jamoasi safida to'p suradi. Yangi mavsum oldidan barchangizga omad va zafarlar yor bo'lishini, jarohatlardan yiroq yurishingizni tilab qolaman.

Ta'kidlash joizki, “Navbahor” PFK prezidenti “Bu yil chempion bo'lamizmi?” deb so'raganda, yosh futbolchilar bir ovozdan “Ha” deyishganini alohida e'tirof etish joiz. Bugungi kunda A'zam Rajabbaev ustozlik qilayotgan “Navbahor-U-18” jamoasi safida iqtidorli yoshlar bisyor. Albatta, mavsum davomida o'zidan yorqin tassurot qoldirgan yoshlar bilan muntazam tanishtirib borishni rejalashtirganmiz. Ularni bugun yaxshilab tanib olsak, kattalar jamoasi o'tishganida, “Navbahor”ning yangi strategiyasi nechog'li foyda keltirganiga guvoh bo'lishimiz mumkin.

“Navbahor” PFK matbuot xizmati.

Manba: pfcnavbahor.uz