«Manchester Yunayted» Premer Ligada shaxsiy rekordini takrorladi

«Manchester Yunayted» Angliya chempionati 29-turi doirasida «Kristal Pelas»ga qarshi kechgan 3 mart kungi o'yinda durang qayd etdi (0:0).

Ole-Gunnar Sulsher qo'l ostidagi jamoa Premer Liga 2020/21 yilgi mavsumida olti marta (ligada eng ko'p) nursiz durang qayd etdi.

Bu orqali «Manchester Yunayted» klub rekordini takrorladi. Jamoa 2004/05 va 2016/17 yilgi mavsumlarda ham chempionatda oltita durang qayd etgandi.

Ta'kidlash joiz, mankunianlar barcha musobaqalar doirasida ketma-ket uch o'yindan beri 0:0 hisobini qayd etmoqda. Avvalroq jamoa «Chelsi» (APL) va «Real Sosedad» (Evropa Ligasi) bilan nursiz durang o'ygandi.

Shu bilan birga «Manchester Yunayted» mavsum boshidan beri ketma-ket 14 ta safar o'yinida yutqazmadi. Bunaqasi liga tarixida beshinchi marta kuzatildi. Undan avval «Lids» (1973/74), «Liverpul» (1987/88) va «Arsenal» (2001/02 va 2003/04) ushbu natijaga erishgandi.