«Navbahor» «Qo'qon-1912» bilan durang o'ynadi

Bugun Namangandagi “Markaziy” stadionda “Navbahor” va “Qo'qon‑1912” jamoalari o'rtasida o'rtoqlik o'yini o'tkazilib, unda jangovar durang qayd etildi ‑ 1:1.

Uchrashuvning dastlabki bo'limida “Navbahor” futbolchilari ko'plab hujumlar uyushtirishdi, jumladan, Ivan Solovyov, Marko Putinchanin, Azimjon Ahmedov va Igor Golbanda imkoniyat paydo bo'ldi. Ammo o'sha vaziyatlarda qo'qonliklar posboni faollik ko'rsatdi. O'yinda hisobni mehmonlar ochishdi. 38‑daqiqada O'tkir Yusupov qaytargan to'pni Mo'min Meliev darvozaga aniq yo'lladi – 0:1. Birinchi bo'lim xuddi shu hisobda yakunlandi.

Ikkinchi bo'limda har ikki jamoa tarkibida bir qator o'zgarishlar kuzatildi. Ta'kidlash joizki, “Navbahor”ning zaxiradan tushgan futbolchilari o'yinni ancha kuchaytirishdi. “Lochinlar” tashabbusni qo'lga olib, bir qator hujumlar uyushtirishganiga qaramay, ulardan samara chiqara olishmadi. “Lochinlar” javob golini 81‑daqiqada urishdi. Shohruh Mahmudhojiev faol harakat qilib, raqiblar jarima maydonchasiga kirib bordi va to'pni qulay vaziyatda turgan Ivan Solovyovga etkazdi. Jamoaning rossiyalik legioneri ushbu vaziyatda bo'sh qolgan darvozani ishg'ol qildi – 1:1.

Goldan keyin ruhiy ustunlikka ega bo'lgan “Navbahor” futbolchilari yana bir qator imkoniyatlarga ega bo'lishdi. Shunga qaramay, uchrashuvda darvozalarga boshqa to'p kiritilmadi va jamoamiz “Qo'qon‑1912” bilan o'yinda durang qayd etdi.

O'rtoqlik o'yini
3 mart (chorshanba)
“Navbahor” – “Qo'qon‑1912” – 1:1 (0:1)
Hakamlar: Ibrohim Ismoilov, Maksim Nexochin, Islomjon Nosirov, Muzaffar Mamatxanov.
Gollar: Ivan Solovyov (81) - Mo'min Meliev (38).
“Navbahor”: O'tkir Yusupov (Rahimjon Davronov), Davron Hoshimov (Farhod Mirahmatov), Igor Golban (Nikola Tasich), Azimjon Ahmedov, Mirzohid  G'ofurov, Marko Putinchanin, Sardor Telyakov (Quvondiq Ro'ziev), Abbos G'ulomov (Zabihillo O'rinboev), Ivan Solovyov, Ehsoni Panshanbe (Sherzod G'ulomjonov), Slavisha Stoyanovich (Shohruh Mahmudhojiev).
“Qo'qon-1912”: Muzaffar Abdullaev, Bobur Akbarov, Slavko Lukich (Avaz Mamatxo'jaev), Asadbek Sobirjonov (Anvar Hojimirzaev), Farhod Bekmurodov (Aleksandr Merzlyakov; Ilhom Vahobov), Shohnazar Norbekov (Jamshid Rahmatullaev), Mo'min Meliev (Andrey Sidorov), Muhammadanas Hasanov (Sardor Azimov), Ivan Yosovich, Murod Xolmuhammedov, Yakuba Bamba (Iqbol Malikjonov).
Ogohlantirishlar: Muzaffar Abdullaev (44) – Shohruh Mahmudhojiev (89).

“Navbahor” PFK matbuot xizmati.