Namangandagi “Markaziy” o'yingohda yangi mavsumga tayyorgarlik avjida!

Xabaringiz bor, Coca Cola Superliga – 2021 bahslari 9 mart kuni start oladi va “Navbahor” shu kuni o'z maydonida Jizzaxning “So'g'diyona” klubini qabul qiladi.

Jamoa uy uchrashuvlarini o'tkazadigan Namangan shahar, Davlatobod tumanidagi “Markaziy” o'yingohda ayni kunlarda yangi mavsumga tayyorgarlik ishlari qizg'in kechmoqda. Jumladan, mazkur o'yingoh direktori Nabixon Abdug'aniev boshchiligidagi ishchi-xodimlar bugun maydonga qoplangan maxsus plyonkani olib, zamonaviy texnikalar yordamida maydon chimini tekislash ishlarini olib borishdi.

Shuningdek, o'yingohning muxlislar o'rindig'iga to'siq qo'yilgan devorlari hamda panjara va zinalar bo'yalmoqda.

Bundan tashqari, bo'yalgan devorlarga zarar etmasligi, shuningdek, yog'ingarchilikdan saqlash maqsadida, ushbu devorlarga 600 metrga yaqin maxsus tunuka olib kelindi va ularni o'rnatish ishlari olib borilmoqda.

Toshkentdan tashrif buyurgan maxsus mutaxassislar esa “Markaziy” o'yingohda yaroqsiz holatga kelgan deraza oynalarini almashtirish ishlarini olib borishmoqda.

Bir so'z bilan aytganda, “Markaziy” o'yingohda yangi mavsumga tayyorgarlik ishlari avjida!

“Navbahor” PFK matbuot xizmati.