Diego Bardanka: «O'zbekistonda xuddi kinolarda yashayotgandekman»

Bundan bir oy avval «Lokomotiv» bilan shartnoma imzolagan ispaniyalik himoyachi Diego Bardanka Florez "Marca" nashriga O'zbekistondagi hayoti haqida so'zlab berdi.

"O'zbekistonga kelganimdan keyin 2 hafta o'tib, men COVID-19 bilan bog'liq odatlarni unutdim. Bu erda tibbiy niqobsiz yurish mumkinligi meni hayron qoldirmoqda. Bu erda tibbiy niqoblar faqat yopiq inshootlarda taqiladi. Antiseptik vositalardan deyarli foydalanilmayapti, shifoxonalar bo'm-bo'sh.

Mart - sentyabr oyilarida aholining 60-70 foizi koronavirusga chalinishga ulgurdi va immunitet hosil qilishgan. Shu bois, O'zbekistonda hozirda COVID-19 yuqtirganlar kam.

Hayotdan zavqlanyapman, ammo Ispaniya va Evropada nimalar sodir bo'layotganini unutmadim. O'zimni imtiyozga ega insondek his qilyapman. Xuddi kinolarda yashayotgandekman.

Mamlakatga kirishda jiddiy tartib o'rnatilgan. PTsR testlaridan tashqari aeroportda qo'shimcha test o'tkaziladi.

Klub ichida esa hech qanday cheklov yo'q. Trenajer zali, kiyinish xonasi... Hammasi normal holatda. Axir biz shunday hayotga intilmayapmizmi?

"Lokomotiv" — yosh va superprofessional klub. Uning sharoitlari a'lo darajada. Chempionatda etakchilikni qo'lga olishni maqsad qilgan, yuqori ambitsiyaga ega jamoa", — dedi Diego Bardanka.