O'FA va O'zPFL vakillari «Metallurg» qarorgohida bo'lishdi

Xabaringiz bor, Bekobodning “Metallurg” jamoasi yangi mavsumga tayyorgarlikni Toshkent shahrida olib bormoqda.

Bugungi mashg'ulotlardan keyin “Metallurg” PFK o'yinchilari va murabbiylari istiqomat qilayotgan “O'zbekiston” mehmonxonasiga O'FA hamda O'zPFL mutasaddilari tashrif buyurishdi. O'zbekiston futbol assotsiatsiyasidan Dilshod Norqobilov, Dilshod Hakimov, Baxtiyor Shirinov, O'zbekiston professional futbol ligasidan Laziz Qo'chqorov, Jahongir Rahmatullaev “Metallurg” murabbiylari shtabi hamda futbolchilari bilan uchrashishdi.

Mutasaddilar yangi mavsum rejalari, musobaqalarni o'tkazish tartibi, joriy etilayotgan yangi Reglament, qoidalar bo'yicha ma'lumotlar berishdi. Mamlakatimizda o'tkaziladigan barcha futbol musobaqalarida ishtirokchilar oldiga qo'yilayotgan talablar bu yildan yanada kuchaytirilishi alohida qayd etildi. Rasmiy shaxslar – futbolchilar, murabbiylar, klub xodimlarining kelishilgan o'yinlar, totalizator va shunga o'xshash boshqa jarayonlarda qatnashishi jiddiy jazoga tortilishi ta'kidlandi.

Futbol musobaqalarini o'tkazishga mas'ul tashkilot vakillari “Metallurg” PFKga yangi mavsumda muxlislar ishonchini oqlash, klub oldiga qo'yilgan maqsad hamda vazifalarning bajarilishi yo'lida omad yor bo'lishini tilashdi.

“Metallurg” matbuot xizmati