Bobur Abduxoliqov: «Menga pul muhim emas, o'sish uchun Evropani tanladim»

O'zbekistonlik hujumchi Bobur Abduxoliqov faoliyatini Ukraina chempionatida davom ettiradigan bo'ldi.

23 yoshli futbolchi «Rux» klubi bilan uch yillik shartnoma imzolagan. Bitimga kelishuvni yana bir yilga uzaytirish bandi ham kiritilgan. Abduxoliqov yangi jamoasi safida 16-raqam ostida harakat qiladi.

«Rux» futbolchisiga aylanganimdan judayam xursandman. Jamoaga sifatli o'yinim va gollarim bilan yordam bermoqchiman. Sabrsizlik bilan birinchi mashg'ulotlarni kutmoqdaman. Menda boshqa jamoalardan ham yaxshi takliflar bo'lgandi, biroq men uchun pul muhim emas. Futbolchi sifatida o'sishga va o'zimni Evropada, yaxshi chempionatda ko'rsatmoqchiman. «Rux» men uchun tramplin vazifasini bajarib beradi», — dedi Bobur Abduxoliqov.

Bobur Abduxoliqov bunga qadar «Nasaf» jamoasida to'p surib kelayotgandi. Qarshiliklar safida u O'zbekiston chempionati bahslarida 100 dan ortiq o'yin o'tkazib, 37 bor raqiblar darvozasini ishg'ol etgan.

Qayd etish joiz, Bobur «Rux» safida to'p surgan ikkinchi o'zbekistonlik futbolchiga aylandi. 2015—2016 yillarda Maksim Shatskix ham ushbu klub sharafini himoya qilgan va shu erda faoliyatini yakunlagan.

«Rux» Ukraina chempionatida 14-turdan keyin 10 ochko bilan 14 jamoa orasida 13-o'rinda bormoqda.