Sergey Yuranning «O'runov ishi» bo'yicha jarimasi kamaytirildi. Murabbiy yana norozi

"SKA-Xabarovsk" klubi bosh murabbiyi Sergey Yuran "Spartak" yarim himoyachisi Oston O'runovning yoshi kichraytirilgani haqida aytgan fikrlari uchun Rossiya futbol ittifoqi etika qo'mitasi tomonidan 250 ming rubl miqdorida jarimaga tortilgan edi.

Rossiyalik mutaxassis ushbu qaror ustidan apellyatsiya berdi. Ushbu murojaat 17 fevral kuni ko'rib chiqildi hamda jarima miqdori 150 ming rublga kamaytirildi.

"Nima uchun jarimaga tortilganimni hamon tushunmayapman, — dedi Yuran. — Nazarimda, mening so'zlarim hech narsaga ta'sir ko'rsatmadi. Eng muhimi, bunga futbolchi ham, "Spartak" ham e'tibor qaratmadi. O'zbekiston futbol assotsiatsiyasidan kelgan qandaydir xatni yuristimiz ikkimiz ko'rmadik. Agar shunday qaror qabul qilishgan bo'lsa, men nima ham qila olardim.

Sport arbitraj sudga murojaat qilamanmi yoki yo'qmi, hozircha bilmayman. Chunki apellyatsiya bo'yicha qaror bugun chiqarildi. Jarima to'liq bekor qilinishiga umid qilgandim. Tartib-intizom qo'mitasining qarorida aniq gapni ko'rmadik, u erda faqat umumiy gaplar yozilgan. Huquqshunos bilan maslahatlashaman. CAS'ga murojaat qilishim mumkin, chunki 150 ming rubl — bu katta summa!", — dedi Yuran.