EChL. «Leyptsig» - «Liverpul» o'yiniga prevyu

Bugundan Evropa maydonlariga katta futbol qaytadi. Yana stadionlar uzra Chempionlar Ligasi madhiyasi yangraydi. Qiziqarli uchrashuvlar bilan birgalikda, grand jamoalar o'rtasidagi shiddatli bahslarga ham guvoh bo'lamiz. Hozirgi kunda o'z chempionatida ikkinchi raqamli jamoa sifatida o'ynayotgan ikki jamoa, "Leyptsig" va "Liverpul" bahsini ham xuddi shunday uchrashuvlar qatoriga qo'shsak bo'ladi. Mazkur ikki jamoa o'rtasidagi qiziqarli faktlar, jamoa yangiliklari va ehtimoliy tarkibi haqidagi qisqacha prevyuni sizlarga taqdim etamiz.

"Leyptsig"
Guruh bosqichiga qur'a tashlangan paytda "Leyptsig" jamoasi juda qiyin guruhga tushib qoldi. Ular «PSJ», "Manchester Yunayted" va Istanbulning "Bashakshehir" jamoalari bilan pley-off uchun kurashishiga to'g'ri keldi. O'tgan mavsumda EChL yarim finaligacha etib borgan germaniyaliklar bu tasodif emasligini isbotlab qo'yish uchun ham, mazkur o'lim guruhidan tirik chiqishi talab etilar edi. Guruh bosqichida Yulian Nagelsmann shogirdlari o'tgan yilgi yarim finaldagi mag'lubiyat uchun «PSJ» jamoasidan qasos olgan bo'lsa, hal qiluvchi 6-turda "Manchester Yunayted"ni mag'lubiyatga uchratib, 1/8 final bosqichiga yo'llanmani qo'lga kiritishgan. Shunday qilib, nemis jamoasi 12 ochko to'plab, «PSJ» jamoasi bilan birga keyingi bosqichga yo'l olishdi.

Jamoa yangiliklari, yo'qotishlar va natijalar
"Leyptsig" jamoasida deyarli har bir o'yinchi gol urishi mumkin. To'purarlar jadvaliga e'tibor bersangiz, "buqalar safidan hech qaysi futbolchi EChLda 3 tadan ko'p gol urmagan. Nemis jamoasi safida gol urishi mumkin bo'lgan 15 nafar futbolchi borligi bugungi uchrashuvda ularning foydasiga ishlashi mumkin. Bundesligada ham Nagelsmann jamoasida yaqqol ajralib turadigan to'purar yo'q. Poulsen hisobida 9 ta, chap qanot himoyachisi Anxelino hisobida 8 ta gol mavjud. Qolgan ko'pgina o'yinchilarda ham beshta, uchta, to'rtta gol mavjud. Umuman olganda, germaniyaliklar safida hujumchidan tortib, yarim himoyachilar ham, himoyachilar ham gol urishadi. Bu holat esa himoyachilari bilan bog'liq muammoga uchragan "Liverpul" jamoasini qiyin ahvolga solib qo'yishi mumkin. Hozirgi paytda ko'pgina klublarni jarohat bilan bog'liq muammo qiynab kelmoqda va bu holat "Leyptsig" jamoasini ham chetlab o'tmagan. Hujumchi Emil Forsberg yanvar oyi oxirrog'ida jarohat orttirib olgan edi. Katta ehtimol bilan mazkur ushbu futbolchi bugungi uchrashuvni o'tkazib yuboradi.

Stadion bilan bog'liq muammolar
Koronavirus sababli bugungi uchrashuv Germaniyada o'tkazilmaydi. Buyuk Britaniyada virusning yangicha turi aniqlanganligi sababli, bu ikki davlat o'rtasidagi har qanday aviaqatnovga chek qo'yildi. Shoshilinch ravishda "buqalar" rahbariyati aviaqatnov bo'yicha Germaniya hukumatiga murojaat qilishadi, ammo nemislar hukumati bunga ruxsat berishmaydi. Agar 8-fevralgacha uchrashuv o'tkaziladigan maydon haqida UEFAga xabar bermasa, ularga texnik mag'lubiyat yozilishi haqidagi yangiliklar paydo bo'ldi. Bu muammoga UEFA ham aralashdi. Ularning oldida o'yin o'tkazish uchun bir nechta variant bor edi. London, Sochi va Budapeshtdagi stadionlardan biri mazkur uchrashuvga mezbonlik qilishi talab qilinardi. Bir hafta oldin UEFA uchrashuv Vengriya poytaxti Budapeshtda joylashgan "Pushkash Arena"da o'tkazilishi haqida xabar berdi. Hozircha javob uchrashuvi o'tkaziladigan stadion ham noma'lumligicha qolmoqda. Norasmiy ma'lumotlarga qaraganda, angliyaliklar ham boshqa mamlakatda o'tkazish variantini ko'rib chiqmoqda.

"Liverpul"
"Liverpul" jamoasi esa guruhda "Atalanta", "Ayaks" va "Midtyullan" jamoalari bilan birga joy oladi. Angliyaliklar dastlabki 3 turda 9 ochko qo'lga kiritib, guruh etakchisiga aylanib olishadi. Keyinchalik, "Atalanta"dan "Enfild"da qabul qilib olingan mag'lubiyat, "Ayaks" ustidan qozonilgan g'alaba va Daniyadagi durang bilan 13 ochko qo'lga kiritadi va pley-off yo'llanmasiga ega chiqishgan.

Yo'qotishlar va yangiliklar
Angliyaliklarda himoya bilan bog'liq muammo haligacha davom etmoqda. Shu muammoni hal qilish maqsadida qishki transferlar vaqtida mersisaydlar ikkita markaziy himoyachi sotib oldi. Ulardan biri debyutini yaqinda amalga oshirgan bo'lsa, yana biri jarohat oldi. Himoyachilarining jarohat olish epidemiyasi yaqinda safga qo'shilgan Ben Devisni ham chetlab o'tmadi. "Lester"ga qarshi o'yinoldi mashg'ulot paytida jarohatlanganlar ro'yxatiga Devis ham qo'shildi.

Umuman olganda, ayni paytda "qizillar" safida 9 nafar futbolchida jarohat bor va ular mazkur o'yinni o'tkazib yuboradi. Devisdan tashqari, "Liverpul" safida Jeyms Milner, Divok Origi, Virjil van Deyk, Nabi Keyta, Diogo Jota, Fabino, Jo Gomes va Joel Matip kabi futbolchilar jarohatini tuzatish bilan ovora bo'lib yuribdi. Yurgen Klopp "Lester"ga qarshi o'yinda Jordan Xenderson va Ozan Kabak juftligidan markaziy himoyani shakillantirdi. bugungi o'yinda Fabinoning maydonga tushish ehtimoli bor. Agar, braziliyalik maydonga qaytsa, Xenderson bilan ajoyib markaziy himoya juftligi paydo bo'lishi mumkin. Kuzatamiz.

Ichki muammolar
Bir paytlar braziliyalik darvozabon Alisson bilan shartnoma imzolanishi "Liverpul" uchun katta muvaffiqiyat sifatida qaralgan edi. O'ziga berilgan ishonchni ortig'i bilan bajarib berishga harakat qilayotgan braziliyalik, APL oxirgi turlarida qo'pol xatoga yo'l qo'ymoqda. "Manchester Siti"ga qarshi uchrashuvda qilgan ikkita xatosi, yakunda 1:4 hisobidagi mag'lubiyatga sabab bo'lgandi. O'tgan haftadagi "Lester"ga qarshi uchrashuvda shunday voqea yana sodir bo'ldi. To'pga chiqishda xatoga yo'l qo'ydi, Jeymi Vardi esa vaziyatdan unumli foydalanib ketdi. Darvozabonning xatolari bor, ammo shuni adolatli ravishda ta'kidlash kerakki, nafaqat Alisson faoliyatidagi qiyin davrni boshdan kechirmoqda, balki "Lester"ga qarshi uchrashuvda o'ng qanot himoyachisi Trent Aleksandr-Arnold 45 marta to'pni yo'qotib qo'ydi. 128 marta to'pga tegingan bo'lsa, shulardan yarmini sheriklariga aniq etkazib berdi.
Inglizlarning tarkibidagi yo'qotishlar darajasi 35,2 foizni tashkil etdi, bu Evropadagi 5 ta eng yaxshi ligalar ichidagi eng yomon ko'rsatkich hisoblanadi.

Umuman olganda, "qizillar"ning yomon o'yiniga faqat bir nechta o'yinchilar emas, balki butun jamoaning ishonchsiz o'yini va jarohatlar muammosi sababiligini ta'kidlab o'tish lozim.

Ehtimoliy tarkiblar

"Leyptsig" (3-5-2): Gulachi, Klosterm, Upamekano, Mukiele, Anxelino, Olmo, Kampl, Zabitzer, Adams, Nkunku, Poulsen.

"Liverpul" (4-3-3): Alisson, Robertson, Fabinyo, Xenderson, Arnold, Alkantara, Veynaldum, Jons, Mane, Firmono, Saloh.

Xulosa o'rnida shuni aytishimiz mumkinki, "Leyptsig" ham, "Liverpul" ham hujumni sevadigan jamoa hisoblanadi. Shundan kelib chiqib xulosa chiqaramizki, bugungi uchrashuv gollarga boy va qiziqarli o'tishi tayin. Uchrashuv Toshkent vaqti bilan 16-fevraldan, 17-fevralga o'tar kechasi tungi 01:00da boshlanadi.

Jamshidjon Mahmudov tayyorladi.