Ayollar terma jamoamiz Antaliyada mashg'ulotlarga kirishdi

“Festival Women’s Trophy 2021” xalqaro turnirida qatnashish maqsadida Antaliya shahriga safar qilgan O'zbekiston ayollar milliy terma jamoasi bugundan e'tiboran mashg'ulotlarga kirishdi.

Kecha terma jamoa delegatsiyasi Toshkent-Istanbul-Antaliya havo reysi orqali parvoz qilib, mahalliy vaqt bilan soat 14.30 da “The Sense De Luxe” mehmonxonasiga etib keldi va koronavirusga test topshirdi. Shu sababli murabbiylar shtabi futbolchilarga dam berishga qaror qildi.

Bugun ertalab Bahrom Norsafarov shogirdlari to'liq tarkibda “Emir Hotels” sport majmuasida mashg'ulot olib bordi. Tiklanish mashqlari bilan boshlangan mashg'ulotlar davomida futbolchilarning texnik va taktik tayyorgarligiga e'tibor qaratildi.

Kunning ikkinchi yarmida O'zbekiston ayollar milliy terma jamoasi Ekvator Gvineyasiga qarshi o'tadigan ertangi uchrashuv oldidan rasmiy mashg'ulot o'tkazishi rejalashtirilgan.