Sergey Kovalyov: «Bektemir Meliqo'zievni ilk to'qnashuvdayoq yanchib tashlayman»

Boks bo'yicha yarim og'ir vazn toifasida WBA Super, IBF, WBO chempionlik kamarlarining sobiq sohibi, rossiyalik Sergey Kovalyov (34-4-1, 29 KO) o'zbekistonlik bokschi Bektemir Meliqo'zievning (7-0, 6 KO) Morgan Fitch ustidan qozongan g'alabasi haqida fikr bildirdi va uning promouteri Andrey Ryabinskiyga murojaat qildi.

«O'zbekistonlik ‘buqa’ uchun tashkil qilingan jang borasida hammasi tushunarli. Yana yigitning ona suti og'zidan ketmagani ham ko'rindi.

Ringdagi birinchi to'qnashuvdayoq uni yanchib tashlayman. Hurmatli Andrey Ryabinskiydan esa to'ydan oldin nog'ora chalmaslikni so'rayman», — deya yozadi Kovalyov.

Avvalroq Ryabinskiy Kovalyov va Meliqo'ziev o'rtasidagi ehtimoliy jangda o'zbekistonlik bokschi g'alaba qozonishini aytgandi.

Eslatib o'tamiz, Bektemir Meliqo'ziev aslida 30 yanvar kuni  Kovalyov bilan jang qilishi lozim edi. Biroq Kovalyovda doping aniqlangani bois jang bekor qilingandi.

Manba: daryo.uz