Baxtiyor Ashurmatov: «Biz o'tgan yildagidek jangovor o'yin ko'rsatamiz»

O'zbekiston U22 jamoasiga qarshi bo'lib o'tgan o'rtoqlik uchrashuvidan so'ng “Qo'qon-1912” jamoasi bosh murabbiyi Baxtiyor Ashurmatov “Sport TV” muxbiriga intervyu berdi.

"O'tgan mavsumda jamoamiz yomon ishtirok etmadi. Lekin mavsum so'nggidagi jarohatlar, zaxira o'rindig'imizning torligi bizni sovrinli o'rinlardan birini egallashimizga to'sqinlik qildi. O'ylaymanki, biz bu yil ham raqobatbardosh jamoa tuza olamiz. Bu yo'lda izlanyapmiz. Jamoamizni nisbatan yoshartirishga harakat qilyapmiz.

Bugungi O'zbekiston olimpiya terma jamoasiga qarshi o'yin biz uchun juda ham foydali bo'ldi. Ko'plab yosh futbolchilarni yana bir bor ko'rikdan o'tkazib oldik. O'rinbosarlar tarkibidan kelgan yoshlarimiz va jamoamizga yangi taklif qilingan yosh futbolchilar bugungi o'yinlari bilan murabbiylar shtabida iliq taassurot qoldirishdi. Sardor Etovqo'ziev, Jamshid Rahmatullaev, Ilhom Vahobov kabi futbolchilar o'yindan-o'yinga jamoamizga moslashib borishmoqda. O'yinning ikkinchi bo'limida baribir yosh futbolchilarimizda biroz tajriba kamligi bilinib qoldi va biz gol o'tkazib yubordik.

Jamoamiz tarkibiga kuchli futbolchilar qo'shilishda davom etmoqda. Yarim himoyachilar Asadbek Sobirjonov va Yakuba Bamba safimizga kelib qo'shildi. Bu futbolchilar o'yinimizni kuchaytiradi deb o'ylayman.

Hozir hamma jamoalar mavsumga jiddiy tayyorgarlik ko'rishyapti. Lekin meni ko'proq o'z jamoamning tayyorgarligi qiziqtiradi. Biz mavsumga yaxshi tayyor bo'lishimiz, o'tgan mavsumdagi natijamizdan kam bo'lmagan natija uchun kurashishimiz lozim. Bu yo'lda biz mehnat qilishdan to'xtamaymiz. Muxlislarimizning esa jamoamizni qo'llab-quvvatlab turishlari hamda jamomizga ishonishlari biz uchun juda muhim. Ular bizni qo'llab turishsa biz albatta o'tgan yildagidek jangovor futbol namoyish qilamiz. Shu o'rinda barcha muxlislarimizga sog'lik va ishlarida omad tilayman", — dedi Baxtiyor Ashurmatov.