Bektemir Meliqo'ziev prof boksdagi 7-jangida amerikalik raqibini 3-raunddayoq nokautga uchratdi (video)

Professional boksning super o'rta vazn (-76,2 kg) toifasida ringga chiqayotgan o'zbekistonlik Bektemir Meliqo'ziev (7-0, 6 KO) 14 fevral, yakshanba tongida o'zining navbatdagi jangini o'tkazdi.

AQShda bo'lib o'tgan ushbu jangda Bektemirga mezbon sportchi Morgan Fitch (19-5-1, 8 KO) raqiblik qildi. Jang 8 raundga mo'ljallangandi. Biroq to'qnashuv 3-raunddayoq yakuniga etdi. Bektemir dastlabki ikki raundda Fitchning tana qismiga og'riqli zarbalar yo'lladi. Uchinchi raundda esa o'zbekistonlik bokschining raqibning tana qismiga yo'llagan navbatdagi zarbasi chuqur nokaut holati uchun etarli bo'ldi.

Shu tariqa, Bektemir Meliqo'ziev professional boksdagi ettinchi jangdagi ettinchi g'alabasini tantana qildi. Fitch uchun esa bu faoliyatidagi beshinchi mag'lubiyat bo'ldi.

Eslatib o'tamiz, mazkur musobaqada yana bir o'zbekistonlik bokschi Elnur Abduraimov ham jang qilishi belgilangandi. Biroq uning raqibi Deyvi Xulio belgilangan muddatga qadar komissiya tasdig'idan o'ta olmagani bois jang bekor qilingan.

Eslatib o'tamiz, Bektemir Meliqo'ziev aslida 30 yanvar kuni yarim og'ir vazn toifasida WBA Super, IBF, WBO chempionlik kamarlarining sobiq sohibi, rossiyalik Sergey Kovalyov (34-4-1, 29 KO) bilan jang qilishi lozim edi. Biroq Kovalyovda doping aniqlangani bois jang bekor qilingandi.