Serbiyalik mafiya a'zolari «Partizan» futbol klubi stadionida makon qurgani ma'lum bo'ldi

Serbiya huquqni muhofaza qilish organlari tomonidan «Partizan» futbol klubi muxlislar guruhi panasida faoliyat yuritayotgan jinoiy guruh etakchilari Velko Belivuka va Marko Milkovich qo'lga olindi.

Belivuka jinoiy to'dasi narkotik moddalar va qurol savdosi, o'g'rilik bilan shug'ullangan, shuningdek, ko'plab qotilliklarga qo'l urgan. 8 fevral kuni mafiya a'zolari uyushgan jinoyatchilikka qarshi urush ochgan Serbiya prezidenti Aleksandr Vuchichga suiqasd hozirlayotgani ma'lum bo'lgan.

Politsiya qator tintuvlarni o'tkazgan, xususan, «Partizan» stadionidagi bunker ham tintuv qilingan. Jinoiy guruh a'zolari bunkerdan o'z maqsadlari yo'lida foydalangan, uning kalitlari faqat Belivuka va uning yaqinlarida bo'lgan. Tintuv vaqtida binodan kishan kalitlari, rezina bolg'alar va mobil aloqa signallarini to'suvchi moslamalar topilgan.

Ekspertlar qon izlari va odam suyagi bo'laklariga duch kelgan. Politsiya taxminlariga ko'ra jinoiy guruh bunkerda odamlarni qiynoqqa solgan va o'ldirib yuborgan, keyin esa murdalar bo'laklarga bo'linib, maxfiy joyga olib ketilgan. Ma'lum bo'lishicha, so'nggi 1,5 yilda o'ndan ortiq kishi jinoyatchilar qurboniga aylangan. O'rganilgan videotasvir ma'lumotlariga ko'ra, ikki kishi stadion bunkeriga kirgan va u erdan qaytib chiqmagani aniqlangan.