O'runov «Spartak» - «Shaxtyor» uchrashuvining eng yaxshi futbolchisi deb topildi (video)

Kecha Moskvaning "Spartak" jamoasi BAAda o'quv-mashg'ulot yig'inlari doirasidagi ikkinchi nazorat uchrashuvini o'tkazdi. Moskvaliklarga bu safar Belorusiya chempioni, Soligorskning "Shaxtyor" jamoasi raqiblik qildi.

Terma jamoamiz a'zosi Oston O'runov "Spartak" safida maydonda to'liq harakat qildi. Uchrashuv teng kurashlar ostida boshlandi. O'yindagi hisobni 25-daqiqada soligorsklar ochishdi. Burchakdan uzatib berilgan to'pni Filipenko boshi bilan darvozaga joylab qo'ydi. Shundan so'ng biroz faollikni oshirgan "qizil-oqlar" ko'plab vaziyatlar yaratishdi. Taym o'rtalarida Oston O'runov o'ziga-o'zi imkoniyat yaratib, darvozabon bilan birga-bir vaziyatga chiqib ketdi, ammo o'zi yaratgan imkoniyatda foydalana olmadi. U tepgan to'p darvoza ustuni yonidan o'tib ketdi. Moskva jamoasi ham, "Shaxtyor" yana ko'plab vaziyatlar yaratdi, lekin 1-taymda boshqa gol urilmadi.

Ikkinchi bo'lim boshlari yana teng kurashlar ostida kechdi. "Shaxtyor" jamoasi ko'plab imkoniyatlardan foydalana olmadi. Ikkinchi taymda ham faol harakat qilgan O'runovni sheriklari qulay vaziyatga chiqardi. Darvozabon ustidan oshirib tepgan to'pga biroz aniqlik etishmadi. 76-daqiqaga kelib, qarshi hujumga o'tib ketgan "Spartak"ning hujumini Ayrton gol bilan yakunlab qo'ydi 1:1. 80-daqiqada Sobolyov moskvaliklarni hisobda oldinga olib chiqishdi — 1:2. Uchrashuvda boshqa gol urilmadi.

Lulichki.net saytining muxbiri o'yinning eng yaxshi futbolchisi sifatida Oston O'runovni e'tirof etdi.

"Uchrashuvning ko'p qismida "Spartak" hujumni tashkil etishda muammolarga duch keldi. Ammo O'rinov asosiy tarkibda xavfli vaziyatlarga ega bo'lgan deyarli yagona futbolchi edi. Ha, Oston ulardan foydalanmadi, ammo umuman hech narsa yaratmaslikdan ko'ra imkoniyatga ega bo'lish va gol urmaslik yaxshiroqdir. O'runov uchrashuvda to'liq harakat qildi va yomon ko'rinmadi. Bu narsa Ostonni ijaraga berib yuborilishdan saqlab qoladimi yoki yo'qmi, bilmadimu, biroq O'runov murabbiyning ko'rsatmalarini yaxshi bajardi", — deya izoh berdi muxbir.