36ga to'lgan Krishtianu Ronaldu nima uchun hamon cho'qqida?

Krishtianu Ronaldu kecha 36 yoshga to'ldi. Tengqurlari allaqachon futbolni tugatgan yo shunga tayyorlanayotgan bir paytda, u hamon cho'qqida.

Uning muvaffaqiyat sirlari, mehnatkashligi tufayli Messi bilan doim bahslasha olgani haqidagi gaplarning ancha siyqasi chiqib ketgan. Keling, undan ko'ra, siyqasi chiqqan ikki voqeani eslatay, bu Ronaldu yutuqlari sirini yaxshiroq ochib beradi.

Birinchisini Evra aytib bergan:

«Bir kuni Ronaldu meni uyiga mehmonga chaqirdi. Dam olish kuni, uning katta uyi bor, mazza qilamiz, deb o'yladim. Bordim. Avval «yur, ozgina to'p tepamiz» deb maydonchaga olib chiqdi. To'pdan ko'nglim aynigan bo'lsa-da, ergashdim. Keyin ovqatlandik, qanaqadir parxez narsalar. Nima eganimni bilmadim. Keyin trenajerga kirdik. Sabrim to'lib borardi. Chiqib, biroz o'tirgach, basseynga, suzishga taklif qildi. Dod deb yubordim, ichimda, ikkinchi uning uyiga kelmayman, deb ont ichdim. Ha, u shunaqa dam olardi».

Ikkinchisini o'sha davrlarda «Yunayted»da o'ynagan ko'p futbolchilardan eshitganmiz. Bir kuni Krishtianu Rio Ferdinandga stol tennisidan yutqazib qo'yadi. Partiya tugagach, barcha jamoadagilar rosa kulib, Rioni olqishlashadi. Ronaldu xuddi jahon chempionatini yutqazgandek, achchiqlanadi, raketkani otib yuboradi. O'sha kuni juda yomon kayfiyatda yuradi.

Ertasiga Ronaldu yangi stol tennisi jihozlarini sotib olish uchun jiyanini magazinga yubordi, uyiga o'rnatdi. Ikki hafta tinmay shug'ullandi va yana bazaga kelib, Rio Ferdinandni o'yinga taklif qildi. Hammaning ko'z o'ngida g'alaba qozondi va tinchidi.

Esingizda bo'lsa, mashhur video bor — unda jurnalist chempionlikni nishonlayotgan «MYu» a'zolaridan futboldagi eng zo'r futbolchini so'raydi.

Ferdinand «Diego Maradona» deb javob beradi.
Yosh Ronaldu «Men» deydi.
Anderson esa, «Mening ismim Diego Maradona» deb, kulib yuboradi.
(Juda kulguli video, topib ko'ring. Aslida u erda faqat Anderson hazillashgan ekan)

Bugun Ferdinand o'sha videoni esladi va «U bilardi. Tug'ilgan kuning bilan» deb yozdi.

Unga javoban, «Yunayted» hozirgi va o'sha paytdagi murabbiyi Mayk Felan ajoyib izoh qoldirdi:

«U birinchi kundan buni aytardi, rostini aytganda, to'g'rimi, Rio?»

Qahramon Aslanov.