«Jenoa» sardori: «Eldor Shomurodov meni hayratda qoldirdi»

«Jenoa» yarim himoyachisi Domeniko Krishito jamoa hujumchisi Eldor Shomurodovning o'yini va A Seriyaga moslashuv jarayoni haqida gapirdi.

"U juda ajoyib. Avvaliga u uyatchan yigit bo'lib tuyuldi, ammo tezda sovuqqonlik namoyish etib, asosiy tarkibda o'z o'rniga ega bo'la oldi. Shomurodov ham o'yin jihatdan, ham maydon tashqarisidagi harakatlari bilan meni hayratda qoldirdi. U kuchli va jamoa uchun juda foydali futbolchi, kurashlarda o'zini ayamaydi va juda katta miqdordagi ishni bajaradi. Shu bilan birga u oz bo'lsa-da, italyancha gapirishni boshladi. Bravo!", — dedi Domeniko Krishito.

2020 yilning oktyabr oyida «Rostov»dan «Jenoa»ga o'tgan Eldor Shomurodov genuyaliklar tarkibida 15 ta o'yin o'tkazib, 2 ta gol va 2 ta golli uzatmaga mualliflik qildi.

«Jenoa» 20-turdan keyin 21 ochko bilan 14-o'rinda bormoqda, «grifonlar» keyingi tur o'yinini 6 fevral kuni «Napoli»ga qarshi o'tkazadi.