Eldor Shomurodov ikkita ko'rsatkich bo'yicha «Jenoa»da eng yaxshi bo'lib turibdi

O'zbekistonlik hujumchi Eldor Shomurodov «Jenoa»ning asosiy futbolchilaridan biriga aylanishga ulgurdi.

A Seriya 20-turiga kelib Shomurodov jami 14 o'yinda qatnashdi. Ularda ikkita gol va bitta golli uzatma amalga oshirdi.

Eldor golli vaziyatlar yaratish borasida genuyaliklar safida eng yaxshi ko'rsatkich qayd etmoqda. 25 yoshli futbolchi shu vaqtga qadar 13 marta raqib darvozasi oldida xavfli vaziyat yaratdi. Bu borada keyingi o'rinlarda Janluka Skamakka (10) va Mattia Destro (9) bormoqda.

Shuningdek, Shomurodov golga olib kelgan hujumlarda muhim uzatmalarni ijro etishda ham etakchi bo'lib turibdi — 6 ta. Bu borada o'zbekistonlik iqtidor egasi Luka Pellegrini, Milan Badel, Skamakka va Paolo Gilone (5 tadan) kabi o'yinchilarni ortda qoldirmoqda.

«Jenoa» 21 ochko bilan 14-o'rinda bormoqda, «grifonlar» keyingi tur o'yinini 6 fevral kuni «Napoli»ga qarshi o'tkazadi.