"Qizilqum" Antaliyadagi nazorat o'yinida g'alaba qozondi

Turkiyaning Antaliya shahrida yangi mavsumga hozirlik ko'rayotgan “Qizilqum” futbolchilari 31 yanvar kuni yig'in doirasidagi ikkinchi nazorat uchrashuvini Bosniyava Gertsogovinaning “Borats” klubi bilan kuch sinashdi.

Raqibimiz “Borats” klubi salkam bir asrlik tarixga ega bo'lib, o'tgan yili mamlakatining yuqori divizonida 4-pog'onani egallagan. 2010 yili Bosniya kubogi ,2011 yil jamoa mamlakat chempionligini qo'lga kiritgan. Uch marta bronza medallariga egalik qilgan...

Keskin kechgan bellashuvning 63-daqiqasida jamoamiz tomonidan uyushtirilgan ajoyib kombinatsiya gol bilan yakunlandi. Sherali Jo'raev o'ng qanotda raqib himoyachisini ustalik bilan aldab o'tib, to'pni jarima maydonchasida qulay vaziyatda turgan gruziyalik hujumchimiz Mate Vatsadzega uzatdi. Tajribali legioner bu vaziyatda raqib posbonini dog'da qoldirishning uddasidan chiqdi- 1:0.

Bu gol uchrashuvda yagonaligini saqlab qoldi va “Qizilqum”ga Turkiya yig'ini davomidagi ilk g'alabani taqdim etdi.

Mazkur bellashuvni jamoamiz quyidagi tarkibda o'tkazdi: Ignatiy Nesterov, Erkin Baydullaev, Muhsin Ubaydullaev, Salim Mustafaev, Sherali Jo'raev, Oleg Tolmasov, Behruz Sa'dilloev, Elguja Grigalashvili, Giorgi Kuxianidze, Oybek Qilichev.

Futbolchilarimiz Turkiya yig'ini doirasida uchinchi nazorat uchrashuvini 2 fevral kuni Ukrainaning “Obolon” klubi bilan o'tkazadi.

Manba: “Qizilqum” PFK matbuot xizmati