Jaloliddin Masharipov Aziz G'aniev jamoasiga o'tadigan bo'ldi

Saudiya Arabistonining "An-Nassr" klubiga o'tishi kutilayotgan Jaloliddin Masharipov faoliyatini Birlashgan Arab Amirliklarida davom ettiradigan bo'ldi. Bu haqda kooora.com'ga asoslanib xabar tarqatdi Stadion.uz nashri.

Chunki ar-riyodliklarga yangi futbolchini ro'yxatdan o'tkazish uchun tegishli ruxsatni ololmadi. "Nassr" jarohat olib mavsum oxiriga qadar safdan chiqqan janubiy koreyalik Kim Jin Suning o'rniga Masharipovni qo'shib olishga harakat qildi. Ammo Saudiya Arabistoni Sport vazirligi ar-riyodliklarga bunga ijozat bermadi.

"Rahbariyat Kim Jin Suning o'rniga Jaloliddin Masharipovni ro'yxatdan o'tkazish uchun jiddiy harakat qildi. Buning uchun barcha hujjatlar taqdim etildi. Ammo yangi o'yinchilarni ro'yxatdan o'tkazish uchun ruxsatni qo'lga kirita olmadik.

Masharipov bo'yicha Arab mamlakatlari va Fors ko'rfazi klublaridan ko'p takliflar oldik. Jamoani inqirozdan olib chiqib ketish uchun echim topishga harakat qildik.

Biz BAAning "Shabab al-Ahli" klubi bilan kelishuvga erishdik. Masharipov mavsum oxiriga qadar ijara asosida Amirlik klubida o'ynaydi", — dedi "An-Nassr"dagi manba.

Eslatib o'tamiz, "Shabab al-Ahli" o'zbekistonlik yarim himoyachi Azizjon G'aniev faoliyat olib boradi. Dubayliklar joriy mavsumda 13ta o'yindan keyin 19 ochko bilan jadvalda 7-pog'onani egallab turishibdi.