Marat Miftaxuddinov: «Bu kabi turnirlarning o'z o'rni bor»

Farg'onada start olgan «Hokim Kubogi» «Bunyodkor» uchun yangilik desak mubolag'a bo'lmaydi. Zero, jamoamiz avval bu kabi musobaqada ishtirok etmagan. Marat Miftaxuddinov murabbiyligidagi «qaldirg'ochlar» ertaga «Hokim Kubogi»da debyutini nishonlaydi. Turnir oldidan murabbiyning fikrlari bilan qiziqdik.

- Dastavval musobaqaga taklif etgani va barcha sharoitlarni yaratib bergani uchun Farg'ona viloyati hokimi Xayrullo Bozorovga «Bunyodkor» futbol klubi nomidan o'z minnatdorligimni bildiraman!

«Hokim Kubogi» singari musobaqalarning o'z o'rni bor. To'g'ri, yangi mavsumga o'rtoqlik uchrashuvlari orqali ham tayyorgarlik ko'rish mumkin, lekin bu kabi turnirlarda futbolchilarda g'oliblikka ishtiyoq yuqori bo'ladi. Raqib qaysi jamoa bo'lishidan qat'iy nazar, yutishni, kubokni qo'lga kiritishni istaydi. Shuning uchun bunday musobaqalar orqali ham jamoa o'yinini shakllantirish g'oliblik ruhiyatini o'stirish mumkin. O'rtoqlik o'yini o'z nomi bilan o'rtoqlik. Unda natija talab qilinmaydi. Faqat o'yinni shakllantirish ko'zda tutiladi.

O'ylaymanki, «Hokim Kubogi»ning nufuzi yildan-yilga ko'tarilib boraveradi. Bu yil Qirg'izistondan jamoa qatnashyapti. Qolaversa, Superligadan vodiy klublaridan tashqari «Bunyodkor» va «Buxoro» ham Farg'onaga etib kelgan. Nasib qilsa, kelasi yildan boshlab turnirda Superliganing boshqa klublari ham qatnashadi degan umiddaman.