Alisher Aripov: «Tibbiy ko'rikdan o'tishda klublarimizga qulayliklar yaratib berilmoqda»

Bilasiz, futbol uchrashuvlarini barcha sanitariya qoidalariga rioya qilgan holda o'tkazilishini ta'minlash maqsadida O'zbekiston Professional futbol ligasi tashkil etgan malakali shifokorlardan iborat Tibbiy komissiya COVID-19 pandemiyasi davrida klublardagi futbolchilar, murabbiylar va boshqa mutaxassislar orasida epidemiologik vaziyatni va ularning sog'ligi holatini nazorat qilish bo'yicha samarali ish olib bora oldi va bu 2020 yilgi mavsumni jiddiy kechikishlarsiz yakunlash imkonini berdi.

Komissiya 2021 yilda ham klublarga tibbiy masalalarda yaqindan ko'mak berish bo'yicha ish olib bormoqda. Endilikda jamoalarning mavsum boshlanishi arafasida tibbiy ko'rikdan o'tish jarayoni oldingidek faqat Toshkentda o'tkazilmaydi. Har bir klub yangi mavsum tayyorgarligi doirasida tibbiy ko'rikdan o'tish uchun poytaxtga kelishi shart bo'lmaydi va o'z shahrida joylashgan tibbiy muassasada ko'rikdan o'tishi mumkin bo'ladi.

Ushbu jarayonning qay tariqa tashkil etilishi va uning afzallik tomonlari haqida O'zPFL Tibbiy komissiyasi raisi – tajribali sport shifokori Alisher Aripov so'zlab berdi:

- Odatda har mavsum oldidan jamoalar barcha a'zolarini chuqurlashtirilgan tibbiy ko'rikdan o'tkazishadi. Mazkur jarayon ilgari markazlashtirilgan holda Toshkentda o'tkazib kelinar edi. Buning qator afzallik tomonlari bor bo'lsa-da, bir jihatdan butun tarkibni yig'ib, Toshkentga kelib-ketish, qolaversa, barcha klublar bir tibbiy muassasada ko'rikdan o'tgani bois navbati kelishini kutish har qanday klubning mavsumoldi rejalarida kichik qiyinchiliklar yuzaga keltirar edi. Shu kabi jihatlarni bartaraf etish, klublarga bu borada engillik yaratish maqsadida endilikda mavsum oldi tibbiy ko'rikdan o'tishda jamoalarga o'z shahrida joylashgan tibbiy muassasalarga murojaat qilishga ruxsat berildi. Klub endi poytaxtga kelib-ketishi zarur bo'lmaydi.

Tibbiy komissiya tomonidan tekshiruvdan o'tish lozim bo'ladigan ko'riklar ro'yxati ishlab chiqib, klublarga taqdim etiladi. Klub istalgan tibbiy klinikada mazkur tekshiruvlardan o'tadi. Buning yana bir qulay jihati shundan iboratki, agar jamoa o'z qarorgohida yoki boshqa biror joyda yig'in tashkil etayotgan bo'lsa, Toshkentdan yoki viloyat markazidan mavjud bo'lgan mobil laboratoriyalarni o'sha qarorgohga taklif etgan holda ham tibbiy ko'rikni tashkil etishi mumkin bo'ladi.

Va yakunda har bir futbolchining tibbiy tekshiruv natijalari va xulosalari O'zPFLning maxsus elektron tizimi – MyLeague onlayn platformasiga yuklanadi. Bu orqali endi har bir futbolchining tibbiy ma'lumotlari elektron shaklda to'planib, monitoring qilib boriladi. Bu ham oldinga tashlanayotgan qadamlarimizdan biri, deb o'ylayman.

Hali oldindagi rejalarimiz katta. Maqsadimiz shuki, har bir klubda faoliyat olib borayotgan shifokorlar faoliyatiga ko'mak beraylik, ularning ish ko'lami va samaradorligini oshiraylik. Sekin-asta sport shifokorlari sonini orttirgan holda yaqin kelajakda har bir klubimizda bir necha nafar shifokordan iborat tibbiy markaz faoliyat yuritishiga erishmoqchimiz, - dedi malakali shifokor.