O'runov nima uchun «Spartak»da o'ynab keta olmadi? Mutaxassis javob berdi

«Ufa» direktorlar kengashi raisi Rostislav Murzagulov yarim himoyachi Oston O'runovning «Spartak»dagi faoliyati borasida o'z fikrini bildirib o'tdi.

— Oston nima uchun Moskvada o'ynab keta olmadi?
— Shunchaki u ertaroq ketdi. U endigina boshqa mamlakatga, boshqa chempionatga kelgandi. «Ufa»da bir nechta o'yinlarni o'tkazdi. Futbolchining imkoniyatlarini bilmagan, Ostonni mashg'ulotda qanday ishlayotganini ko'rmagan notanish murabbiy unga darhol ishonch bildirishini kutish — soddalik bo'lardi. Unga atigi 10 daqiqa o'ynash imkoniyati berilishini kutgandim. Taxminan shunday bo'ldi ham. U yosh yigit, maydonga chiqadi, ulkan stadion, ko'plab muxlislar... Bunda ko'p narsa ruhiyatga ham bog'liq. Uning o'ynab ketishi qiyin kechishini bilardim. Lekin u o'zini sinab ko'rdi. Uning kelajagi yaxshi. Uning o'rnida bo'lganimda "Ufa"da yana yarim yil - bir yil o'ynagan bo'lardim. Shunda u bor mahoratini ko'rsata olgan bo'lardi. Barcha murabbiylar uning imkoniyatlarini yaxshi bilgan bo'lardi. Shundan so'ng tantanali ravishda katta jamoaga o'tgan bo'lardi. U esa biroz shoshildi.

— Unga qo'ng'iroq qilib, «Oston, ortga qayt», demaysizmi?
— Afsuski, bu mening vakolatimga kirmaydi. Agar O'runov jamoamizga qaytsa, bundan faqat xursand bo'lardim. Bu ishni amalga oshirish qiyin bo'ladi, deb qo'rqaman.

— Nima uchun?
— Oston, «Spartak» safiga o'tganidan keyin narxi qimmat futbolchiga aylandi. Bunday o'yinlarni bizning byudjet ko'tarmaydi. Biz esa yangi O'runovlarni qidirishda davom etamiz.