Zarruh Adashev UFC’dagi ikkinchi jangida ham mag'lubiyatga uchradi

BAAdagi (Abu-Dabi) «Jangchilar oroli»da 20 yanvar, chorshanba kuni UFC Fight Island 8 musobaqasi bo'lib o'tmoqda.

O'zbekistonlik yakkakurashchi Zarruh Adashev (3-3) mazkur kechada UFC’dagi ikkinchi jangini o'tkazdi. Unga xitoylik Su Mudaerji (14-4) raqib bo'ldi.

Birinchi raund o'rtacha tempda o'tdi va xitoylik yakkakurashchi biroz faolligi tufayli raundni o'z foydasiga hal qildi. Ikkinchi raundni o'zbekistonlik sportchi yomon boshlamadi va vaziyatlarning birida raqibini muvozanatdan chiqarishga ham muvaffaq bo'ldi. Biroq raundning ikkinchi yarmida Adashev bir nechta jiddiy zarbalarni o'tkazib yubordi.

Uchinchi raundda Zarruh sezilarli daraja faollashdi va uni o'z foydasiga hal qildi. Yakunda hakamlar bir ovozdan Su Mudaerjining g'alabasini qayd etdi — (29:28, 29:28, 30:27).

Shu tariqa, Adashev promoushendagi ikkinchi jangida ham mag'lubiyatga uchradi. Avvalroq Zarruh debyut jangida Tayson Nemga qarshi oktagonga chiqib, ilk raunddayoq nokautga uchragandi.

Manba: daryo.uz