O'zbekiston OTJ vakillari Ispaniyaga etib borishdi

O'zbekiston olimpiya terma jamoasi a'zolari bugun erta tongda Ispaniyaga yo'l olishgani haqida xabar berib o'tgandik. Lyubinko Drulovich boshchiligidagi terma jamoamiz delegatsiyasi Toshkent - Istambul - Valensiya yo'nalishi bo'ylab uchib, Ispaniyaga etib borishdi. Valensiya shahridan ular avtobusda San-Pedro-del-Pinatar shahriga yo'l olishadi. Yig'in aynan mana shu shaharda o'tkaziladi. Yig'in davomida terma jamoamiz bir qator nazorat uchrashuvlari o'tkazish rejalashtirilgan.

Eslatib o'tamiz, O'zbekiston olimpiya terma jamoasi shu yilning mart oyida kelasi yil Taylandda bo'lib o'tadigan Osiyo chempionati saralashida qatnashadi. Saralash bahslari Toshkentda o'tkazilib, terma jamoamiz a'zolari Osiyo chempionati yo'llanmasini qo'lga kiritish uchun Tojikiston, Hindiston va Pokiston terma jamoalariga qarshi bahs olib borishadi.