«Spartak» O'runovni 1 mln. evrodan qimmatga sotsa, Gazizov ushbu transferdan foyda oladi

 «Spartak» klubi yarim himoyachi Oston O'runovni 1 mln. evrodan qimmatroqqa sotsa, jamoaning sobiq bosh direktori Shamil Gazizov ushbu transferdan foyda oladi. Bu haqda vaziyatga yaqin manba «Chempionat»ga ma'lum qildi.

«O'zbekistonlik futbolchining "Spartak" bilan tuzilgan shartnomasida, agar jamoa O'runovni transfer qilsa, bir milliondan evrodan ortiq qismining yarmini Gazizov oladi. Ya'ni, agar «Spartak» Ostonni 2 mln evroga sotsa, Shamil 500 ming evro oladi», — dedi manba.

«Spartak»ning jamoatchilik bilan ishlash direktori Anton Fetisovning aytishicha, O'runov bo'yicha taklif tushsa, jamoa uni ko'rib chiqishga tayyor.

«Oston O'runov bo'yicha shuni aytishim mumkinki, u jamoa bilan yig'inga yo'l oldi. Agar taklif tushsa, ko'rib chiqamiz. Ayni paytda takliflar tushmagan», — dedi Fetisov.

O'runov 2020 yilning yozida «Ufa»dan «Spartak» safiga o'tib ketgan edi. Ushbu transfer Gazizovning tashabbusi bilan amalga oshgandi. O'zbekistonlik o'yinchi moskvaliklar safida barcha musobaqalar doirasida 9ta o'yinda maydonga tushib, bitta gol muallifiga aylandi.