Rasman: Shahzodbek Ubaydullaev — «Shaxtyor» (Soligorsk) o'yinchisi

Yangi mavsumda o'zbekistonlik futbol ishqibozlari UEFA chempionlari ligasida “Shaxtyor” (Soligorsk) klubiga muxlislik qiladigan bo'lishdi.  Bekobodning “Metallurg” jamoasi hujumchisi va to'purari Shahzodbek Ubaydullaev bugun Belarus chempioni – “Shaxtyor” klubi bilan shartnomani rasmiylashtirdi.

Belarus chempionatida to'p surayotgan o'zbekistonlik futbolchilar soni yana bir nafarga oshdi. «Metallurg» klubining 22 yoshli hujumchisi 8 yanvar sanasida Belarusga uchib ketgandi. Ubaydullaev bo'lg'usi klubi qarorgohida tibbiy ko'rikdan o'tdi. Kecha tomonlar bir to'xtamga kelishdi hamda o'zaro  shartnoma imzolandi. Eslatib o'tamiz, o'tgan yili mazkur klub sharafini o'zbekistonlik boshqa bir o'yinchi Jasur Yaxshiboev ham himoya etgandi.

Eslatib o'tamiz, Shahzodbek Ubaydullaev o'tgan yili “Metallurg” tarkibida Superliganing 26 o'yinida maydonga tushib, 8 ta gol urgandi. Bundan tashqari Shahzodbek Ubaydullaev 2020 yilgi mavsumdan e'tiboran O'zbekiston milliy terma jamoasi murabbiylari e'tiboriga tushdi. MTJning yig'inlariga jalb etildi va uchta o'rtoqlik uchrashuvida maydonga tushirildi. Shahzodbek o'zining O'zbekiston MTJ tarkibidagi debyut uchrashuvidayoq Tojikiston milliy terma jamoasi darvozasini ishg'ol etgandi.

Shahzodbek Ubaydullaevga “Metallurg” tarkibidagi samarali mavsum uchun minnatdorchilik bildiramiz va “Shaxtyor” (Soligorsk) tarkibida Belarus chempionati hamda xalqaro maydonlarda omad yor bo'lishini tilaymiz!