"Paxtakor" o'yindagi statistik ko'rsatkichlar bo'yicha ham Superliga-2020ning yaqqol etakchisi

"Sherlar" 2020 yilgi mavsumda o'yindagi turli jihatlar borasida ham qolgan jamoalarga nisbatan ancha yaxshi natija ko'rsatishdi.

"Instat" kompaniyasi taqdim etgan ma'lumotlarga ko'ra, "Paxtakor"ning umumiy indeksi 243ga teng bo'lgan. "Nasaf" 221, "Bunyodkor" 212, "Lokomotiv" va AGMK esa 210 ball to'plagan.

"Paxtakor" chempionatda eng ko'p golli vaziyatlar yaratgan - 202ta. Bu borada keyingi jamoalar "Nasaf" (144), "Bunyodkor" (142), "So'g'diyona" (128) va AGMK (124) bo'lgan. Burchak zarbalarini o'yinga kiritishda ham "Sherlar" etakchilik qilishgan. Jamoamiz mavsum mobaynida 159 marta shunday ishni amalga oshirgan. "Bunyodkor" 138, "So'g'diyona" 128, "Nasaf" 119 va "Metallurg" 113 bor burchakdan to'pni o'yinga kiritgan.

Darvozaga zarba berishda "Paxtakor"ning ko'rsatkichi 196taga teng bo'lgan. Keyingi o'rinlarda bu jihat bo'yicha "Bunyodkor" (152), "Nasaf" (141), "So'g'diyona" (114) va AGMK (108) jamoalari joylashgan. Futbolchilarimiz jami 16141tani uzatmani amalga oshirgan (bir o'yinga o'rtacha 646ta). Bizdan keyingi jamoalar bu ko'rsatkich borasida ancha ortda qolib ketgan. "Bunyodkor"da uzatmalar miqdori 12777, AGMKda 9840, "Nasaf"da 9339 va "Navbahor"da 8877tani tashkil qilgan.

Hal qiluvchi uzatmalarni amalga oshirishda jamoamiz 120ta urinish, krosslar bo'yicha esa 144ta harakat bilan eng yaxshi ko'rsatkich egasi bo'lgan. Umumiy kurashlar, himoyaviy va havodagi kurashlarni yutish bo'yicha "So'g'diyona" jamoasi eng yaxshi natija qayd etgan.

Manba: “Paxtakor” PFK matbuot xizmati