Dahshat! «Real Madrid» tarixidagi eng kuchli futbolchilar ramziy jamoasi

Stadion.uz yaqindagina Kataloniyaning «Barselona» jamoasi tarixidagi eng kuchli futbolchilardan tashkil topgan ramziy jamoani e'tiboringizga havola etgan edi. Endi navbat «Real Madrid»ga! 

Darvozabon: Iker Kasilas

Iker Madrid super klubiga 16 yoshli o'spirin paytida tashrif buyurgan edi. Klubni sayyoramizning eng kuchli darvozabonlaridan biri sifatda tark etdi. Klub safida barcha sovrinlarni boshi uzra ko'tardi. Jahon chempionligini qo'lga kiritdi. Ikki bor Evropa chempionatining oltin medallariga ega chiqdi. 

Himoyachilar: Roberto Karlos 

Chap qanot himoyachisi «Real» uchun o'zining eng zo'r yillarini bag'ishladi desak, adashmagan bo'lamiz. Braziliya terma jamoasi safida JCh oltin medallariga ega chiqqan Karlos, o'zining kuchli zarbalari bilan muxlislar yodida qolgan desak, adashmagan bo'lamiz. U bugungi avlod muxlislari uchun chinakam afsona!

Serxio Ramos 

«El kapitano» «Real Madrid»ning 21 asrdagi eng yaxshi futbolchisi. Jamoaning yangi asrdagi barcha g'alabalari u bilan chambarchas bog'liq. Ramos ayni damda jamoa bilan yangi shartnoma borasida muzokaralar olib bormoqda. 

Fernando Yerro 

Yerro klub safida 600 ga yaqin o'yin o'tkazgan bo'lib, 126 ta gol kiritishga muvaffaq bo'lgan. Ramosga qadar Madrid super klubida sardorlik qilgan Yerro ayni damda murabbiylik sohasida o'zini sinab ko'rmoqda. 

Marselo 

Braziliyalik futbolchi ham 21 asrning eng kuchli qanot himoyachilaridan biri. U o'zining pik formasiga chiqqan paytlari, to'xtatib bo'lmas kuchga aylanar edi. Uning Ronaldu bilan birgalikda tandem hosil qilishi «qirollik klubi»ning ulkan g'alabalariga katta hissa qo'shgan. 

Yarim himoyachilar: Zayniddin Zidan

Zidan «Yuventus» va «Bordo» klublarida to'p surgan bo'lsada, aynan Madrid klubining afsonasi sanaladi. «Galaktikos» atamasi yoga tushishi bilan barchaning ko'z o'ngiga Zidan kelishi turgan gap. Futbolchi bugungi kunda zamonaviy futboldagi eng kuchli murabbiylardan biri sanaladi. 

Luka Modrich

Xorvatiyalik futbolchi mana 10 yildan beri «Real»ning ajralmas bo'lagi sifatida faoliyat olib bormoqda. 2018 yilda «oltin to'p»ni o'ziniki qilgan xorvat yuqori darajada futbol namoyish etishda davom etmoqda. 

Alfredo Di Stefano

Argentinada tug'ilgan bo'lsada, Alfredo Ispaniya terma jamoasi sharafini himoya qildi. Uning «Real Madrid»ga ko'chib o'tishi, o'tgan asr uchun ulkan voqea bo'ldi. Qahramonimiz klub safida deyarli 100 ga yaqin rekordlarni o'rnatdi. Keyinchalik, bu rekordlarni boshqa bir mega yulduz o'ziniki qilganiga qaramay uni muxlislar hali-hamon xotirlashadi. Afsuski, 2014 yilning 5 iyul sanasida Di Stefano 89 yoshda olamdan ko'z yumdi. 

Hujumchilar:Xento 

Ushbu ro'yxatimizdagi eng sovrindor futbolchilardan biri bilan tanishing. Xento «qirollik klubi» safida naqd 6 bor Evropa chempionlar kubogi (o'sha davrdagi YChL) oltin medallariga ega chiqadi. U Pushkash, Kopa, Ektorlar bilan birgalikda «engilmas» jamoani tashkil etgan edi. Xento jamoaning katta arenalardagi g'alabalari chog'ida jamoa sardori sifatida harakat qilgan. 

Ferents Pushkash

Vengriya futboli afsonasi «Real Madrid»ning o'tgan asrdagi eng kuchli hujumchilaridan biri sanaladi. Pushkash 537 ta o'yinda ishtirok etgan bo'lib, o'z hisobiga 516 ta gol yozdirib qo'yadi. Afsuski, keyinchalik murabbiylik sohasiga qo'l urishi unga omad olib kelmadi. Qahramonimiz 2006 yilda o'pkadagi saraton sababli olamdan ko'z yumdi. 

Krishtianu Ronaldu 

Ronaldu «Real Madrid» klubi tarixidagi eng yaxshi to'purar sanaladi. O'ylashimcha, uning bu ro'yxatda bo'lishini hech kimni hayron qoldirgani yo'q. «Qaymoqranglilar» hujumchisi jamoa libosida nimalarni amalga oshirgani haqida soatlab suhbat qurish mumkin. Shunga qaramay, bir narsa aniq! Krishtianu klub safida to'p surgan eng buyuk futbolchilardan biri!