AQSh shaxmat federatsiyasi vakiliga aylangan Gulruhbegim Tohirjonovaning otasi: «O'zimizning federatsiyaga kerak bo'lmasa, biz nima qila olamiz?»

O'zbekistonlik xalqaro grossmeyster Gulruhbegim Tohirjonova AQSh shaxmat federatsiyasi a'zosiga aylandi. 21 yoshli shaxmatchi AQShning Missuri universiteti jamoasi safida dona surmoqda va bundan keyin xalqaro musobaqalarda Amerika sharafini himoya qiladi.

«Daryo» muxbiri Gulruhbegimning bu tanloviga nima sabab bo'lganini aniqlash maqsadida sportchining otasi Alisher Mo'minov bilan bog'landi.

«Gulruhbegim AQSh shaxmat federatsiyasi a'zosiga aylandi. U 21 yoshga kirdi va bu borada o'zi qaror chiqardi. Fuqaroligini o'zgartirgani yo'q, u hali ham O'zbekiston fuqarosi. Faqat musobaqalarda AQSh nomidan qatnashadi.

AQSh federatsiyasi qizimga barcha sharoitlarni yaratib bermoqda. Masalan, hozirda u Missuri universitetiga tahsil olmoqda. AQSh olti yillik o'qishi uchun 150 ming dollar mablag' ajratgan. Barcha xarajatlari, xususan, musobaqalarga borishi xarajatlari ham qoplab berilmoqda, murabbiylar bilan ta'minlanmoqda.

O'zbekiston shaxmat federatsiyasiga bunday o'yinchilar kerak emas! Federatsiya Guruhbegimning opalari Xulkar va Nafisani terma jamoadan chiqarib yuborish uchun bor imkoniyatini ishga soldi va shunga erishdi. O'zimizning federatsiyaga kerak bo'lmasa, biz nima qila olamiz?

Qaytaraman, bu qizimning qarori. Men ota sifatida uning qarorini qo'llab-quvvatladim. Yana bir jihat, federatsiya almashtirish murakkab ish emas. Agar u O'zbekistonga haqiqatda kerak bo'lsa, qaytib kelishi mumkin», — deydi Alisher Mo'minov.

«Daryo» muxbiri bu masalada O'zbekiston shaxmat federatsiyasining ham munosabatini bilishga urindi. Biroq federatsiya saytida keltirilgan +998 71 241 12 00, +998 71 231 25 69 raqamlariga ulanishning iloji bo'lmadi.

Ta'kidlash joiz, Gulruhbegim ayollar o'rtasida 2018 yilgi Jahon chempionatida qatnashib, chorak finalga qadar etib borgan va unda bo'lajak chempion Szyuy Venszyunga yutqazib qo'ygandi.

Ma'lumot uchun, Alisher Mo'minovning uch nafar qizi — Nafisa Mo'minova, Xulkar va Gulruhbegim Tohirjonovalar professional shaxmatchi hisoblanadi. Nafisa Mo'minova 2013 yilda xalqaro grossmeyster maqomini olgan va bu borada O'zbekistondagi ilk ayol grossmeysterga aylangandi. Uning singillari ham qator xalqaro musobaqalar g'olibi hisoblanadi. Ayni vaqtda Nafisa Mo'minova Evropaning nomdor shaxmat klubida o'z faoliyatini davom ettirmoqda.