«PSJ» Tuxelga qancha kompensatsiya to'lashi ma'lum bo'ldi

"Pari Sen-Jermen" bosh murabbiy Tomas Tuxel va uning yordamchilarini muddatidan avval iste'foga chiqargani uchun katta miqdorda kompensatsiya pulini to'laydi.

"Le Parisien" tarqatgan xabarga ko'ra, ushbu summa 7 million evroni tashkil qiladi.

"PSJ" rahbariyati germaniyalik mutaxassisga iste'fo haqida qaror qabul qilinganini ma'lum qildi, ammo bu haqda klub rasmiy xabar tarqatmadi. Tuxel bilan birga uning ikki yordamchisi va jismoniy tayyorgarlik bo'yicha murabbiy jamoani tark etishadi. Parijliklarni esa Maurisio Pochettino boshqarishi kutilmoqda.  

"PSJ" o'tgan mavsumda Tuxel boshqaruvida Frantsiya chempionati, Frantsiya kubogi, Liga kubogi, mamlakat superkubogida g'olib chiqib, Evropa chempionlar ligasi finaliga qadar etib bordi.

Ma'lumot o'rnida. "PSJ" 2016 yilda Loran Blanni iste'foga chiqargani uchun 22 milliona evro miqdorida kompensatsiya to'lab bergan edi.