«Andijon»: 90 foiz futbolchilar bilan xayrlashib, barcha e'tiborni akademiya va yoshlarga qaratamiz!

«Andijon» ushbu mavsum Superligada qolishga erishdi. Bizning keyingi yilga qo'ygan maqsadimiz hamma kutganidan boshqacharoq bo'ladi. Biz 90% futbolchilarimiz bilan xayrlashamiz. Biz o'zimizning andijonlik yoshlarga e'tiborimizni qaratmoqchimiz. Har yilgiga o'xshab chetdan futbolchi olib kelish maqsadimiz yo'q. Asosiy e'tiborimizni mahalliy yoshlarga qaratmoqchimiz. Bunga "Mash'al" va "Nasaf" jamoalarini misol qilib ko'rsatishimiz mumkin. To'g'ri, bu oson bo'lmaydi, lekin qachongacha chetdan futbolchi olib kelib futbol qilamiz? Balki bir mavsum qiyinchilik bo'lar, balki 2 mavsum qiyinchilik bo'lar, ammo bu natija berishiga ishonamiz.

Aynan ushbu mavsumda Doniyor Abdumannopov va Farhod Sohibjonovga berilgan imkoniyatdan futbolchilarimiz foydalanib, murabbiylar va rahbarlar ishonchini oqlab, o'zini ko'rsata oldi. Kelgusi mavsumda shu kabi yoshlarga ko'proq imkon berishni maqsad qilganmiz.

Yillar mobaynida «Andijon» klubi akademiyaga va akademiya tarbiyalanuvchilariga bee'tibor bo'lgan va iqtidorli futbolchilarning ba'zilari boshqa jamoalar e'tiboriga tushib, o'sha jamoalarga o'tib ketgan. Ba'zilari esa, afsuski, jamoasiz qolib, futbolni tark etgan. Bunga sabab klubni yoshlarga e'tiborsizligi bo'lgan. "Andijon" akademiyasidagi har bir yosh futbolchining asosiy maqsadi bosh jamoa safida to'p surish maqsadi bo'lishi kerak. Shunday bo'lishi uchun esa biz har bir tarbiyalanuvchiga e'tiborli bo'lishimiz kerak va ishonch va imkoniyat berishimiz kerak.

Biz vaqtlar davomida stadion, jamoa bazasi va futbol akademiyasini rivojlantirishga e'tibor qaratamiz. Bilasiz, necha yillar davomida jamoamizda murabbiylar va futbolchilar almashaverdi. Har bir murabbiy o'zining futbolchilaridan jamoani shakllantirishga harakat qiladi va natija ko'rsata olmaganidan so'ng jamoada yana murabbiy o'zgarib va yana futbolchilar almashadi. Qachongacha bunday tizim davom etadi? Qachongacha biz chetdan futbolchilarni olib kelishimiz kerak?

Bizda ham shu kungacha qanchadan-qancha iqtidorlar yo'q bo'lib ketdi, buning sababi aynan shu tizim bo'lgani uchun. Bizning maqsadimiz eski tizimni o'zgartirish, futbolchilarga sarflanadigan mablag' o'rniga jamoa stadioni, bazasi va akademiyaga mablag' sarf qilib, rivojlantirish. Bunga oz vaqt ketmasligini bilib turibmiz, buning uchun hamma bir yoqadan bosh chiqarib rahbarlar, murabbiylar, futbolchilar, muxlislar va Andijon xalqi sabr va mehnat bilan erishishimiz kerak.

«Andijon» matbuot xizmati.