2020 yilning eng yaxshi to'purari aniq bo'ldi (+ro'yxat)

"Bavariya" hujumchisi Robert Levandovski 2020 yilning eng yaxshi to'purari unvonini o'zida saqlab qoldi.

Polshalik futbolchining yaqin ta'qibchisi — "Yuventus" hujumchisi Krishtianu Ronaldu kecha "Fiorentina"ga qarshi o'yinda gol ura olmadi. Shu bois, portugaliyalik futbolchi Levandovskiga etib olish imkoniyatini qo'ldan chiqardi. "Yuve" keyingi bahsni yanvar oyida o'tkazadi.

Levandovski 2020 yilda 47ta to'p kiritdi (klub va terma jamoa safida). Ronaldu esa 44ta gol bilan cheklandi. "Inter" forvardi Romelu Lukaku raqiblar darvozasini 40 marta ishg'ol qildi. Belgiyalik futbolchi bugun "Verona"ga qarshi o'yinda ishtirok etmoqda.

Dortmundning "Borussiya" klubi hujumchisi Erling Xoland 39ta gol bilan 4-pog'onani band etdi.

Tugallanayotgan yil Lionel Messi uchun u qadar samarali kelmadi. Argentinalik futbolchi mazkur yilda bor-yo'g'i 27ta gol urdi, xolos. U reytingning 7-pog'onaciga joylashdi ("Barselona" 2020 yilda yana bitta o'yin o'tkazadi).

2020 yilning eng yaxshi to'purarlari:

1. Robert Levandovski ("Bavariya") — 47
2. Krishtianu Ronaldu  ("Yuventus") — 44
3. Romelu Lukaku ("Inter") — 40
4. Erling Xoland ("Borussiya D.")  — 39
5. Chiro Immobile ("Latsio")  — 33
6. Kilian Mbappe ("PSJ") — 28
7. Lionel Messi ("Barselona")  — 27
7. Andre-Per Jinyak ("Tigres", Meksika) — 27
9. Muhammad Saloh ("Liverpul") — 26
10. Karim Benzema ("Real")  — 22
10. Zlatan Ibrahimovich ("Milan") — 22
10. Xarri Keyn ("Tottenxem") — 22
10. Neymar ("PSJ") — 22
10. Son Xyong Min ("Tottenxem") — 22.