«Bunyodkor» himoyachisi Ukraina chempionatiga ko'chib o'tishga yaqin turibdi

«Bunyodkor» klubining 19 yoshli himoyachisi Ibrohimxalil Yo'ldoshev faoliyatini Ukraina chempionatida davom ettirishi mumkin. Unga Ukraina premer-ligasining 4ta klubi qiziqish bildirmoqda.

Bu haqda futbol agenti Nikita Shvets Footboom'ga bergan intervyusida ma'lum qildi. Ammo o'zbekistonlik futbolchiga qaysi jamoalar qiziqish bildirayotgani haqida ma'lumot berilmadi.

«Ha, bu rost. Men Yo'ldoshevning Ukrainada agenti hisoblanaman. Hozirda muzokaralar ketmoqda va unga UPL klublari tomonidan qiziqish mavjud.

Ibrohimxalil faoliyatini Ukrainada davom ettirish ehtimoli yuqori. Aynan qaysi jamoalar? Afsuski, hozircha buni ayta olmayman. Jadvalda dastlabki 10ta pog'onani egallab turgan klublar bilan muzokara olib borilayotganini tasdiqlashim mumkin», – dedi Shvets.

Ibrohimxalil Yo'ldoshev Superliganing joriy mavsumida 22ta o'yinda maydonga tushib, bitta gol urdi va bitta golga uzatma berdi. U O'zbekiston terma jamoasi safida 4ta uchrashuvda ishtirok etdi.

Manba: www.footboom.com