Dibala safga qaytdi, Artur esa yo'q

Turinning «Yuventus» klubi bosh murabbiyi Andrea Pirlo jamoa hujumchisi Paulo Dibala navbatdagi turda «Fiorentina» klubiga qarshi bo'ladigan o'yinga maydonga tushishga tayyor ekanligini aytdi.

— Dibala jamoaning umumiy mashg'ulotlarda qatnashmoqda. U maydonga tushishga tayyor. Artur esa tarkibda bo'lmaydi.

«Fiorentina» ustozi Prandelli bilan birga o'tgan shirin xotiralar qolgan. U bilan birga Evropa chempionati finaligacha etib borganmiz, Jahon chempionatida va Konfederatsiyalar Kubogida ishtirok etganmiz. Diqqat-e'tibor bilan Vlaxovich va Riberilarni kuzatishimiz kerak, — dedi Pirlo.

14-doirasida «Yuventus» — «Fiorentina» bahsi 22 dekabr kuni Toshkent vaqti bilan soat 00:45da boshlanadi.