Shota Arveladze: "Jangovor tarkibimiz bilan o'ynaymiz"

Ertaga Namagan shahridagi "Navbahor" stadionida bo'lib o'tadigan O'zbekiston Kubogi final uchrashuvi oldidan tashkil etilgan matbuot anjumanining ikkinchi qismida "Paxtakor" klubi bosh murabbiyi Shota Arveladze va jamoa himoyachisi Egor Krimetslar ishtirok etdi.

Arveladze: - Barchaga xayrli kun. Hammaga sog'liq tilayman. Qo'qondagi o'yindan keyin eng kuchli jamoalar yarim finalga etib kelganini aytgandim. Finalda ham shunday. Raqibimiz yaxshi jamoa. Avvalgi ikki finalda ham shu klub bilan to'qnash kelgandik. Mavsumni barqaror o'tkazdik deb o'ylayman. Final qiyin va qiziqarli kechadi. Raqib finalda o'ynashni yaxshi biladigan jamoa.

Krimets: - Yana bir hal qiluvchi bahsga etib kelganimizdan xursandman. Mavsumni sovrin bilan yuqori kayfiyatda yakunlash imkoniyatiga egamiz. Muxlislarga chiroyli va hujumkor o'yin namoyish etib berishga intilamiz. Vodiyda futbolni juda yoqtirishadi. Biz ularga xush keladigan o'yin ko'rsatishga urinamiz.

Arveladze: - Biz jangovar tarkibda o'ynaymiz. Farruh Sayfiev diskvalifikatsiya sababli o'ynay olmaydi.

- Futbolda imkon boricha yaxshi sharoitlarni yaxshi darajaga keltirib, barchasi doimiy o'sib borishiga urinish lozim. Aytaylik, maydon, yoritish tizimi yoki boshqa jihatlar bo'yicha muammolar bo'lmasligi kerak.

- Sovrinlarga ega chiqish doimo yoqimli. Biz bunga barqaror erishayotganimiz yanada xursandchilik beradi. Hech bir jamoa biror sovrindan keyin to'xtab qolishni xohlamaydi. Biz yangi-yangi g'alabalar uchun intilamiz.

- Jamoamiz safiga kelgan har bir o'yinchi yaxshi o'ynab keta olmasligi mumkin. Butun dunyoda shunday. Yaxshi futbolchilar kuchliroq klublarga o'tishadi. Tarkibimizda o'zimizdan chiqqan tarbiyalanuvchilar ko'p. Krimets, Masharipov, Sergeev, Anzur Ismoilov, Alijonov, Kozak, Sobirjonov, Erkinov, Sidiqov. Qolaversa, legionerlarni ortiqcha jalb etmay mahalliy futbolchilarni xarid qilyapmiz. Bu esa pullar o'zbek futbolida qoladi degani.

Krimets: - Shu erda kichik to'ldirish berishni xohlardim. "Paxtakor"da hamma ham yaxshi o'ynab keta olmaydi. Bosimga chidash oson emas. Shunga dosh berganlar juda yaxshi o'ynab ketishgan.