“Navbahor”ning o'yinlariga qancha muxlis tashrif buyurdi?

“Navbahor”ning Superliga-2020dagi statistik ma'lumotlari bilan tanishtirishda davom etamiz.

Xabaringiz bor, pandemiya sababli Coca Cola Superliganing ko'plab o'yinlari, aniqrog'i, 4-18-turlardan o'rin olgan bahslar tomoshabinlarsiz o'tkazildi.

Shunday bo'lsa-da, “Navbahor”ning yakunlangan mavsumdagi o'yinlariga tashrif buyurgan muxlislar soniga e'tibor qaratishni lozim topdik.

Yakunlangan mavsumda “Navbahor” o'yinlariga jami 60981 nafar tomoshabin tashrif buyurdi.

E'tiborlisi, “Navbahor”ning Namangandagi bahslariga 29104 nafar, safardagi o'yinlariga esa 31877 nafar ishqiboz tashrif buyurgan.

Biroq, shuni ham ta'kidlash joizki, Coca Cola Superliganing dastlabki 3 ta turida hali yurtimizda pandemiya boshlanmagan va o'sha uchrashuvlarda tomoshabinlar soni ham cheklanmagandi (19-turdan boshlab stadionlarga cheklangan miqdordagi muxlislarning tashrif buyurishlariga ruxsat etildi).

Aytish joizki, dastlabki 3 ta turning ikkitasini “lochinlar” safarda, ya'ni “Paxtakor”ga qarshi Toshkent hamda “Andijon” bilan Andijonda o'tkazishgan, mazkur shaharlarga ham Namangandan ham ko'plab muxlislar tashrif buyurishgandi.

Ta'kidlash lozimki, “Navbahor”ning ilk 3 ta turdagi o'yinlariga jami 55800 (!) nafar ishqiboz tashrif buyurdi.

Shuningdek, Superliganing yakunlangan mavsumida bir uchrashuvda eng ko'p muxlis to'plash bo'yicha rekord ham "lochinlar"ga tegishli.

Superliganing 2-turidan o'rin olgan va 6 mart kuni Namangandagi “Markaziy” o'yingohda bo'lib o'tgan “Navbahor” – “Lokomotiv” bahsiga 25328 (!) nafar tomoshabin tashrif buyurgandi.

Bir so'z bilan aytganda, so'nggi yillarda muxlis to'plash borasida etakchilikni bermay kelayotgan jamoa ishqibozlari yakunlangan mavsumda ham (pandemiyadan oldin va cheklangan miqdordagi muxlislarga stadionlarga kirish ruxsat berilganidan so'ng) “Navbahor”ni bevosita stadionlarda munosib tarzda qo'llab-quvvatlashdi hamda “lochinlar”ning g'alabalariga madadkor bo'lishdi.

Buning uchun “Navbahor” PFK jamoamiz muxlislariga o'z minnatdorchiligini bildirgan holda, ularga sog'liq – salomatlik tilaydi.

“Navbahor” PFK matbuot xizmati.